افتكاسات و حاجات

الصفحة دى عبارة عن تجميعة للافتكاسات اللى بكتبها يعنى عشان يبقى الوصول ليها اسهل

افتكاسات و حاجات : شعر بس حصرى

http://wp.me/p20vCP-3P  ‏ و ده اللينك اللى نشرته فيه عالمدونة

شعر بس مش شعر عادى شعر غريب شوية و مختلف مش هتلاقوه غير هنا عشان حصرى كلمتين كدة كتبتهم امبارح باليل و انا مكنتش عارفة انام و كنت حطة ورق جنبى و كل ما ييجى حاجة فى دماغى اكتبها و كنت مزعلة ناس كتير منى يا رب يكونوا سامحونى عشان كدة الحاجات دى اهداء للناس اللى انا زعلتهم و اهداء لكل حد ضحى بعمره عشانى و كل حد ضحى بنور عينى لاجل ما يعود النهار و كل حد بينزل الشارع و عارف انه ممكن يموت عشان يجيبلى حقى و يجيب للمصريين حقهم رحم الله شهدائنا  اهداء مخصوص لعبدالله اللى اتضرب ادام مجلس الشعب سلامتك يا سيدى ثانية واحدة فى تصحيح مراسلنا بيقول ان عبدالله ماتضربش بيقول دة هو اللى قطعهم اساسا و طار و راح نازل على كردون الاخوان قاموا خافوا منه و تراجعوا اظاهر مراسلنا بيتكلم عن سوبر مان لووول :)  و كابتن تيتو و كابتن جعفر من فريق حليب العادلى اعتزلوا الكورة باين؟ معرفش ليه بكتب اهداء اساسا و هو مش كتاب بس يمكن عشان نفسى اعمل كتاب؟ عمتا يا رب الناس متكنش زعلانة منى بسم الله نبدأ :D

  وطنى مالك بعيد و انا ماشى فى رحبك

الفين شهيد و شهيد  متى ينتهى كربك؟

و الكلب عاضض فيك مستولى على ارضك

و كمان لسانه سليط مستقوى على شعبك

——————————-

يا مصر يا مرية ما تفوقى يا ولية

حكامك ولاد الكلب قتلوا الامان فيا

هدفى و حلمى بسيط و ذاع فى الكون السيط

قالوا بينّه عبيط بيقول يا حرية

——————————-

            خلال سنة فاتت زن على عشك غراب

و الاف الاف و الاف اندفنوا تحت التراب

و ما بين يقن و يقين حطوا مليون سراب

جابوا الهرم و السم دسوه جوا الشراب

و انا بحتضر و بموت قاموا شوية شباب

مات منهم اللى مات و الباقى عمره ما ساب

وطنه و حريته لباغى او كذاب

و الحكام الملاعين عملوله الف حساب

——————————-

دى كلمة سر فى لسانك

تجمع شعب فى ميدانك

و شباب مستغنى علشانك

و منتيش حاسة بقيمة الدم

ليه مشايلانا كل الهم؟

و رسالة اخيرة يا حبيبتى

قولى لطنطاوى يتلماه و جميع الحقوق محفوظة على فكرة اموت و اعرف الحقوق دى بيحفظوها فين

افتكاسات و حاجات : شعر

http://wp.me/p20vCP-3w    ده اللينك اللى نشرته فيه عالمدونة

يا مصر من حبك القلب صدا و مال  ~ احنا اللى ملينا؟ ~و لا انتى نومك طال

يا مصر فيكى النيل ~ و الحر فيكى عميل ~ عالارض دمه يسيل ~ غالى يا مصر الدم

يا مصر مليانة  ~ امراء و سجانة ~ واكلة و شبعانة ~ و احنا اللى منسيين

فيكى كلنا مساجين ~ نشكى يا مصر لمين؟ ~ و انتى اللى سجنانا

مصر يا اية ~ دمعة و ضحكاية ~ فاكرة و نساية ~ و الشعب فيكى اصيل
على ضهره همه يشيل ~ و سعدك هو الغاية

دى شوية حاجات كنت كتبتها من فترة بس الورق اللى كنت كاتباه عليها ضاع فكتبت لى اد ما افتكرت

افتكاسات و حاجات: حوارات ساخنة

http://wp.me/p20vCP-3A  ده اللينك اللى نشرته فيه عالمدونة

من شوية كدة المشير كلمنى و كدهون و قالى انه محتاجنى عشان طبعا ذكائى الملحوظ و بتاع و عايزنى اطلعه من الازمة بس و دار بينا حوار  و انتوا عارفين انا مبخافش من حد و معنديش اسرار و هاسرد لكم الحوار زى ما هو بدون اى تدخل من طبعا

المشير: منقذتى اهلا بيكى يا ريسة

انا: سيادة المشير حبيب هارتى

المشير: انتى كنتى قايلالى انك جايبالى اخبار مهمة

انا:اه ده حقيقى

المشير: طب قولى يلا

انا: هى طنط خروج امن تبقى خالتك؟

المشير: اه, ليه؟

انا: كنت جاية اقولك انها ماتت يا روح خالتك

المشير: اتكلمى عدل انتى فى حضرة المشير

انا : عسكر؟ مايحكمشى “بصوت غادة غبدالرازق و اديها واحدة ضحكة خليعة”

المشير: شيلو البت دى ارموها برة .. ادى اخرة اللى يمشى ورا العيال

انا: قال البقية فى حياتك قال الهى ما يبقى فى حياتك بقية يا بعيد

المشير: يا رب لأ يا رب لأ

انا:صحيح سيادة المشير كان عندى ليك سؤال بس هيفيدك اوى

المشير: اتنيلى قولى

انا: لماذا لا يموت ولاد الوسخة؟

المشير: برررررررررررررررررررررررررررررة

بس كدة طردنى طرد كلاب :)

انا و نفسى و ضميرى حلقة الاولى

نهار داخلى 25 يناير امام الكمبيوتر و محروق دمى
انا: الله يحرق النت الزفت دة يا جدع فين ايامك يا مبارك كان الواحد متابع اللى بيحصل
ضميرى: بقولك ايه متستهبليش هو كان فى فيسبوك اساسا زى النهاردة السنة اللى فاتت
انا: يا عم كان فى تويتر مالكش دعوة انت
ضميرى: يا بت يا كدابة انت مش فاكرة يوم الخميس 27 كنتى هتموتى و قعدتى تجيبى مواقع تكسر البروكسى عشان تخشى خلسة
انا: يا سلام عليك يا واد يا مؤمن .. ادينى دلوقتى مش عارفة ادخل على موقع كسر البروكسى حتى
ضميرى: بت انتى هبلة؟ تكسريه ليه اساسا ما المواقع مفتوحة لوحدها هو انتى غاوية سرقة؟
انا: لا فى دى عندك حق
ضميرى: على فكرة انا طول عمرى عندى حق
انا: لا فى دى ماضمنلكش
ضميرى: لا
انا: ششششت
ضميرى: بس
انا: مات الكلام
ضميرى: اسمعى بس
انا: جزرة و قطمها جحش
ضميرى: غورى فى داهية على فكرة
انا: انا مش هرد عليك انت قليل الادب اصلا
ضميرى: انا هو انتى خلى بالك
انا: كلامك مش مقنع يا بابا
ضميرى: انت مقرفة انا مش هتكلم معاكى
انا: فى داهية كتك القرف
ضميرى: شفتى انتى كمان قليلة الادب يلا بقى
انا: انا هقطعلك لسانك عشان تتعلم الادب

One thought on “افتكاسات و حاجات

  1. Mohamed قال:

    هذه المشكلة الأساسية يا سيدتي

    كلنا نتحاور مع ضمائرنا بأي لغة كانت و بأي أسلوب فهو أنا و أنا هو لا ضير بأن أسبه أو أتلفظ بالعبارات الخادشة أو أي شيئ نتفاهم به مع بعضنا ،،،إلا أنه هذا الأسلوب أن يمتد إلى الآخريين فالآخر سيعتبره تطاول أو إساةء أدب و هو ما دفع بشباب الثورة إلى الخسارة الفادحة سواء في الانتخابات خاصة و خسارة الرأي العام بشكل عام
    حيث ظهر في صورة الشاب الذي ليس له كبير حتى و إن كان معه كل الحق ، يتطاول هنا و هناك على الكبير من الرموز يمكن بدافع الغيرة على الوطن أو بدافع من إحساس بالقوة و نشوة الإنتصار و لكن تناسى أننا شعب له مرجعيه و أخلاقيات حتى و إن خَيّل لنا أنها إندثرت و لكن تعود مع أول تصادم أخلاقي

    الأدب مع النفس هو بداية التصالح و إعلان الهدنه مع النفس و المجتمع

    أشكرك

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s