ظواهر “مصرية” مثيرة “للدجل”


البتاعة دى بقى عبارة عن ظواهر احنا كمصريين بنواجهها يوميا و انا حبيت اتكلم فيها و انا مش ببقى محضرة حاجة اكتبها انا بكتب اى حاجة بيجى فى دماغى عن الموضوع دة و عشان كدة دة لا يعبر عن اى اراء شخصية و لا عن اى حاجة خالص المهم

ظاهرة العربيات:

عندك بقى العربيات فيها ظواهر كتير مسيرة للدجل يعنى مثلا اتوبيس النقل العام بتلاقيه ناحية منه فيها كرسيين جنب بعض و الناحية التانية كرسى واحد السؤال بقى ليه الحكومة عملت كدة؟عاملين جزء لل

couples  و جزء لل single?

حاجة غريبة  فعلا و بعدين لازم يجرحوا مشاعر الناس ؟ ممكن يكون مش كلكم شوفتو دة بس انا شفته

عندك مثلا التوك توك عبارة عن عربية نقل عملت بيبى طلع منها البتاع دة و غالبا التوك توك او اى عربية بتعبر عن شخصية اللى راكبها يعنى مثلا لو اللى راكب التوك توك سينجل بتلاقيه حاطط بوستر ليه وبيبقى مدى على سومة العاشق او احمد سبايدر و بيبقى بالظبط زى كدة:

لو هو مرتبط بقى بيبقى غالبا مرتبط بحد مشهور و تلاقيه حاطط صورة نانسى عجرم او اليسا مثلا و ساعات هانا مونتانا!

لما بيكون متجوز بيحط اسماء عياله عالتوك توك او التاكسى و يكتبلك البرنس حسين و البرنسيسة حسنية مثلا بس اكتر حاجة بتأثر فيا اللى بيكتب حكم على عربيته يعنى مثلا تلاقيه كاتب “طالع نازل واكل شايل .. و بغسل لبسى بصابون سايل” لا انا مشفتش حد كاتب كدة بس دى حضرتنى فى اللحظة دى مرة مثلا شفت واحد كاتب “دى مش سرقة ولا ورث دى جاية بخلع الدرس” و انا تلقائيا يومها باليل خليت ابويا ياخدنى عند دكتور اسنان عشان اخلع درسى يمكن يجيلى عربية بس محصلش و مثلا حد كاتب

“No women, No cry”

دى برضو مؤثرة جدا لانك بتعرف ان الشخص دة متجوز يعينى و غالبا هو جايب العربية عشان يبقى السواق الخصوصى بتاع الهانم

  بس اللى اثرت فيا فعلا و كنت عايزة اعيط كان واحد كاتب

“No mozaz , No life”

و دى اول ما شفتها استنتجت ان الشخص دة مبيشفش مزز للاسباب التالية:

1- انه ساكن فى منطقة مفيهاش و لا مزة و دى مش مشلتنا يعزل بقى هو و يتصرف

2- انه شكله شبه الاحدب نوتر دام و البنات يتخاف منه

3-ان البنات بتخاف من الجملة العجيبة اللى على عربيته و لما بيشفوها بيهربو بسرعة قبل ما يقفشهم

ظاهرة الممثلين:

الممثلين و المشاهير عندنا فى مصر برضو مثيرين للدجل و خصوصا ان كل واحد منهم بيحب يطلع فى نفس الدور طول حياته يعنى مثلا عمرو دياب بيحب يلعب دور التاكسى و كاتب اسم عياله على ايده الاتنين

مثلا تامر حسنى بيحب يلعب دور “شعر السدر حسين” دايما

غادة عبدالرازق دايما دور المنحرفة لو طلعت غير كدة تمووووت و منة شلبى طبعا

بس المشكلة الاكبر ان المشاهير عندنا بيحبوا السياسة بس بيحبوا يخلطو بينها و بين الدراما و يقعد يعملك افلام عربى هابطة و اكبر مثال طنط عفاف شعيب يعنى غنية عن التعريف

ظاهرة المهرجانات:

اكتر المهرجانات اللى اثرت فيا مهرجان “هاتى بوسة يا بت” الفنان عندك هنا بيقول للبت هاتى بوسة يا بت هاتى حتة يا بت السؤال هنا ايه هى الحتة اللى هو عايزها؟ يعنى هى معاها شيكولاتة مثلا و مش عايزة تديه منها حتة؟ خصوصا انه بيقول حبيبى بياكل شوكلاته و بيشرب مانجة بشفاطة طب ليه مقلهاش هاتى بوسة يا بت هاتى حبة يا بت ممكن يكون عنده حساسية من المانجة؟

و فى جزء بيقولها دى الوسادة الخالية تعبت منى يا غالية! طب هى الوسادة ذنبها ايه فى الليلة دى؟ و بعدين المشكلة ان البت اللى هو بيغنيلها غالبا مسمعتش الاغنية لانها لو سمعتها اكيد هتحن حتى عشان الوسادة اللى تعبت دى و ممكن تتبرع له بكليتها و كمان المشاعر الفياظة اللى فى الاغنية مش ممكنة و بيجى يقولك استاذ فى الشياكة اللى بيبقى بيسمع بيبقى مستنيه يقول استاذ فى الشياكة استاذ فى التناكة بس هو بيخيب املنا كلنا و يقول استاذ فى الشياكة استاذ فى الدلع

  حاجة كمان بيقولها و باستغرب لها بيقول شممونى بصلة اغم عليا فى الافلام العربى لما حد بيغم عليه بيشمموه بصله عشان يفوق مش عشان يغم عليه و عاملين بقى نسخة تانية من الاغنية اسمها “هاتى بوسة يا حجة” الظاهر البت نفضت له فقرر يشوف الحاجة امها مثلا؟ على اساس انهم عيلة مبتقولش لأ؟ و بيقول خلاص يا دنيا تعبت معاكى ناس بتضحك و انا باكى و بيقولك وانت فيك ايه ايه مظبوط لا رفرف نافع و لا كبوت؟ على اساس انه بيحب عربية ملاكى؟ دة مش مظبوط فعلا يعنى احنا كنا فاكرين ان الشخص اللى مش طبيعى لو ولد بيحب ولد زيه لكن يحب عربية دى مش طبيعية وبعدين عربية عند سمكرى مش فى الاجانس مثلا !

اللى مش فاهم انا تكلم عن ايه يسمع المهرجان مؤثر فعلا

فى عندك بقى مهرجان بهية بيقولها طفى النور يا بهية دة معسكر دوليه هل المهرجان دة ليه خلفية سياسية و حكم العسكر؟ و بعدين ييجى يقولك فى البحر سمكة بتزق سمكة ! طب هو ليه بيعمل كدة و بيدمر ذكريات طفولتى و قال كل انواع السجاير و الحشيش المشكلة كمان ان معظم كلمات المهرجان مش مفهومة و فى حد بيغنى كورس شكله كان فى غرزة قبل ما ييجى يسجل الاغنية و سردينة فاتح المدرسة و بيدى دروس خصوصية! فى المدرسة عادى كدة؟ و الحكومة سايباه؟

http://www.youtube.com/watch?v=7sYgOGzNHwA&feature=related  و برضو اللى مش فاهم اهو

سيبنا من المهرجانات لان لو هنركز معاهم كلهم مش هنخلص!

ظاهرة صبيان و بنات:

نبدأ بالبنات عشان مثيرين للدجل اكتر تبقى ماشى فى الشارع فى امان اللى بتلاقى واحدة كانت بتعمل كيكة فى بيتهم و مخدتش بالها انها بتحط على وشها الدقيق و البيض و كل مستحضرات التزيين اللى كانت هتعمل بيهم كيكة بدل المكياج يا عينى و بعدين يعنى اللى هى حاطاه على وشها دة المفروض يكفى عشر بنات لمدة سنة هى استخدمتهم فى نزلة واحدة و فى الاخر يقولك مبنعرفش نشيل المكياج و يقعدوا يعمللهم ادوات تشيل المكياج و مية نار و حاجات كدة

فى بنات بقى بتخاف من الصراصير و ممكن يجيلها جلطة فى قلبها لو شافت صرصار فى حين ان الصرصار دة لو تفت عليه تقة واحدة هتضيع مستقبله لانه هيحصله حاجة من تلاتة اما هيموت او هيفقد احد اطرافه و يتشل او هيقطع الخلف

و هو لو جدع و عملها حاجة اخره هيعضها فى صبع رجلها الصغير دة لومكانتش لابسة حاجة فى رجلها و لو لابسة حاجة و هو قرب منها مش بعيد الريحة تجيبله اختناق و بنقلوه عالمستشفى

بالنسبة للصبيان بقى بيحبوا اوى يغلسوا عالبنات و فى نوع بيبقى غتت و ممكن كل يوم يروح لامه مضروب بسبب اللى بيعمله تجربة شخصية شفتها بعينى محدش قالى مرة واحد ماشى ورا بنت و بيعاكس و البنت مليانة شوية و عمال يقولها ايه يا جميل مش نعمل ريجيم بقى طب يا بن الهبلة ما تشوف واحدة جاهزة و لا انت لازم تغتت بس كدة دة اللى عندى عن الصبيان!

ظاهرة الاسرة المصرية:

الاسرة المصرية عندها طقوس غريبة يعنى مثلا يقولك صاحب بالين كذاب يعنى لو انت بتذاكر و فاتح الكمبيوتر يبقى انت صاحب بالين و يبقى انت مبتذاكرش لكن مثلا لو دخلت للحاجة الوالدة المطبخ او و هى بتشتغل و كنت عايز تكلمها تقولك اتكلم و انا بشتغل طب ما انتى كدة يا حاجة صاحبة بالين لكن مش كذابة لا سمح الله محدش يقدر يقول كدة طبعا و لو انت عملتلها امتحان و سألتها كنت بتقول ايه غالبا بتسقط دايما طب ليه كدة هو انا مش ابنك مثلا؟ انتى متبنيانى؟

و يقولك مثلا اللى بيلعب فى النار بيعمل بيبى على نفيسه باليل و و انت صغير مكنتش تلعب فى النار و مع ذلك بتعمل بيبى برضو و لما كبرت ميتبطلش لعب فى النار ليل و نهار و مبيحصلكش حاجة عادى جدا

و يقولولك لو مخلصتش اكلك الاكل هيجرى وراك يوم القيامة انا معنديش حاجة اقولها فى الموضوع دة غير حلقة رسينى

و مثلا متقطفش وردة عشان يوم القيامة انت هتتحول لوردة و هى هتيجى تقطفك و تموتك طب هل انا قابلية التحول لاشكال مختلفة دى عندى؟يعنى انا زى الراجل الرملة دة وكدة؟ طب ما انا اتحول لحاجة مبتمتش زى الرملة او اتحول لمية فى بحر مش تروح الصحرا و تتحول لمياه متبقاش غبى عشان هتتبخر اتصرف يعنى مش لازم وردة

فى حاجات كتير عايزة اتكلم فيها فى الموضوع دة بس بنسى عشان مش ببقى محضرة بس اكيد لينا لقاء اخر فى هذا الموضوع لازم طبعا :))

الحلقات التانية هتلاقوها هنا بقى :)

لصفحتنا على فيسبوك اتكى هنا عشان خاطر الوالد

5 thoughts on “ظواهر “مصرية” مثيرة “للدجل”

  1. yomna el sayed قال:

    hahahahahaha xD 7lwww awiiiiiiiiii bgd :D :D

  2. نسيتي ظاهرة البطولة الزائفة
    ان المذيع يطلع يزعق ويسيب القناة عالهوا وتاني يوم يعملوه بطل والناس تسقفله

    عموما الظواهر الغريبة دي أكتر من اللازم وده لاننا في مجتمع في حد ذاته غريب ومش منظم فما بالك باليومين دول

    ملحوظة صورة سبايدر ضايقتني نفسيا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s