ظواهر “مصرية” مثيرة “للدجل” الحلقة التالتة


اول حاجة موجهة للناس اللى مش بتحب الشتيمة او الالفاظ اللى بالنسبة لهم خارجة بس هما بيحبوا يقروا الحاجة اللى بكتبها بصو عشان متزعلوش هعملكوا تحذير قبلها و اكتب “لا مؤاخذة” فتعرفوا ان فى حاجة مش كويسة جاية اه صحيح هى ليه “لا مؤاخذة” سمعتها وحشة اوى كدة؟ هى بنت حرام مثلا؟ تفتكروا بتحس بايه و هى عارفة انها مرتبطة بالاباحة؟ حراام عليكو بجد هى دى مش كلمة من حروف و نقط زى اى كلمة؟ انا هعمل مبادرة و اسميها ” معا لتغيير ثقافة اللامؤاخذة” او مثلا “معا لاعادة حق اللا مؤاخذة”

نبدأ بقى؟
هى بقى دى يعنى ايه اصلا؟ اتحدى اى حد فيكو يطلعلى كلمة موازية ليها من المعجم

نتكلم بجد شوية بقى
عندنا بقى فى اسكندرية يا جدعان فى كافيتيريا اسمها “كافيتريا يا حمزاوى” السؤال هنا هو ليه الراجل اللى عملها سماها  كدة؟ بينه و بين حمزاوى مشاكل شخصية مثلا؟ انا من وجهة نظرى الموضوع و الحوار كان كالأتى

بس بقى و من ساعتها المعلم متضايق و قرر يسمى الكافيتريا “كافيتريا يا حمزاوى”

اللى مش بيحب الكلام اللى مش كويس ميقراش اللى جاية دى -انا عارفة انكو هتقروا برضو بس اللهم بلغت اللهم فاشهد-

فى حاجة غريبة جدا فى لغتنا و هى كلمة مكونة من تلات حروف و بتبقى عبارة عن تعليق اعتراضى كدهون و بتبقى اولها الف و اخرها الف و الحرف اللى فى النص بيبقى حرف توأم الجيم و الخاء بس الكلمة دى بيبقى تأثيرها كبير اوى و انا مش هكدب عليكو انا معرفش معناها ايه او بتعبر عن ايه اللى بيحيرنى بقى ان الكلمة دى عندها اختين واحدة اسمها “احييه ” و التانية اسمها “احووه” بس مع ذلك الناس بتقولهم عادى و ملهمش نفس تأثير ال “ا*ا”  يعنى شوف الدنيا مع انها اصغرهم فى عدد الحروف بس تاثيرها كبير صحيح “يوضع سره فى اضعف خلقه” و الكلم دى بقى بقت منتشرة بطريقه غريبة جدا يعنى مثلا لو اتنين صحاب اتقابلو

الواد رقم 1: صباح الخير

الواد رقم 2: صباح النور

الواد رقم 1: “ا*ا” ياض واحشنى

الواد رقم2: “ا*ا” دا انت اللى واحشنى اكتر

و بيكملو الحوار بقى على هذا المنوال لدرجة ان فى واحد عامل اغنية مخصوص لهذه الكلمة الابيحة اللى محدش عارف معناها الا القليل -محدش عارف معناها دى عايدة عليا انا بس- يعنى تخيلوا حد عامل اغنية بيقول فيها

“ا*ا” الشبشب ضاع

“ا*ا” دة كان بصوباع

طب حضرتك دور عليه على فكرة مش لازم تأبح و بعدين احنا مال اهلنا يضيع و لا يتنيل حضرتك؟ دة مش شبشب جلد دة بصوباع و تلاقيه شبشب بلاستيك معفن

نتكلم شوية عن المدرسين و المدرسة

طبعا عندكو المناهج طبعا مثيرة للهبل مش للدجل يعنى تلاقى مثلا طفل فى اولى ابتدائى و بيدرس نشيد اسمه “قطتى صغيرة” طبعا مش كل الناس فاكرة كلماته بس انا فاكراها كان بيقول

قطتى صغيرة .. اسمها نميرة

لعبها يسلى .. و هى لى كظلى

عندها المهارة .. كى تصيد فارة

ذيلها طويل .. شعرها جميل (باين كدة مش فكرة الحتة دى بصراحة)

السؤال هنا بقى هو ايه المادة التعليمية فى النشيد دة؟ و بعدين ايه نميرة دى؟ دى مصغر نمر؟ على اساس ان الواد متمكن من اللغة يعنى؟ و ايه عندها المهارة كى تصيد فارة دى؟ طب ما هو كل القطط كدة على فكرةو بعدين هو ايش عارفه انها عندها المهارة؟ الا لو كان بيتهم مليان فيران و بعدين لا مؤاخذة القطط بتاعت البيت دى بتبقى قطط سيس و صايصة و لا بتصيد و لا بتنيل!

كمان عندك مثلا قصة عنترة المقررة على الصف الاول الثانوى .. هما ليه منزلين القصة دى فى السن دة بالذات يعنى ليه اولى ثانوى؟ بس طبعا محدش ينكر ان القصة مهمة و فى مواعظ و حكم كتير فيها زى مثلا ان عنترة و هو صغير كان لما يروح يلعب مع العيال كانو بيقعدو يزفوه و يقولو

“احييه .. احووه الواد دة فين ابوه”

يعنى عشان هو كان ملوش اب و كدهون و دة عيب المفروض منتريأش على حد و كانت كل يوم بقى امه تقعد تنزل تتعارك مع الوليات -و ليات دى جمع ولية- اللى فى الشارع و عيالهم عشان بيزعلوا عنترة و طبعا مننساش دور اخوه شيبوب فى التوعية و محاربة الزواج العرفى و الانحراف حتى تلاقى طول القصة فى حوارات بينه و بين عنترة

شيبوب: يا ابنى البت عبلة دى بتتغرغر بيك و مش هتتجوزك

عنترة: لا  قطع لسانك عبلة قالتلى انها هتيجى تطلب ايدى من مامى زبيبة

شيبوب: يا ابنى ركز معايا زبيب ايه و ياميش رمضان ايه احنا بنتكلم على عبلة

عنترة: ايه يا ابن العبيطة امك اسمها زبيبة يا اهبل

شيبوب: قول و النعمة

عنترة: و النعمة

شيبوب: تصدق مكنتش اعرف

عنترة: ايه؟ عمرك ما سمعت الحج شداد و هو بيقولها يا زبيبة؟

شيبوب: لا طول عمرى بسمعو بيقولها يا “بيبى”

عنترة: ايوة عبلة دايما تقولى يا “هونى”

شيبوب: “هونى” ازاى يعنى؟

عنترة: دى زى “دارلينج” كدة يا غبى

شيبوب: يا ابنى بيقولك الواد عمارة بن زياد دة مز فشخ و سيد القبيلة مش هتيسبه و تجيلك يا ابو وش مأيح

عنترة: لا عبلة بتحبنى انا زياد دة اصلا عيل سيس و مامته جايباله دبدوب ميكى ماوس

ثم شرد عنترة فى احلامه و اماله وحيدا شريدا يبكى على الاطلال فذهب الليل ….. و طلع الفجر و عنترة صو صو.. جت عبلة قالها بس بس قالتله نو نو.. زبيبة قالتله سيب عبلة و خليها فى حالها.. راح رامى سيفه و ربط فرسته و راح جر شكلها .. قامت عبلة مخربشة ايده لما مسك ايدهاااا ..و ادى جزاء اللى ميسمعشى كلمة ماما تقولها

فى حاجة مثيرة للدجل فعلا  و هى التدريب اللى المدرسين بيروحوه المشكلة مش فى التدريب و انهم بيغيبوا من الممدرسة اسبوع او اكتر و بيرجعوا زى  ما هما مبيتعلموش حاجة و اكبر دليل عندك ال skills بتاعتهم بجد حاجة مش ممكنة يعنى مثلا بيتعاملو مع الكمبيوتر بتلقائية شديدة  مرة مثلا موقف حصل معايا شخصيا المستر دخل و قالك انهاردة هفرجكوا على فيديو على يوتيوب طبعا احنا زقططنا و قلنا اول حصة مش هتبقى مملة و هنعمل حاجة ممتعة بس هو ابهرنا طبعا بامكانياته

و كان الوضع كالاتى ” – واخدين بالكم من الصور التوضيحية المرة دى؟ جامدة انا مش كدة؟-

فى برضو حاجة كانت بتحيرنى من وا نا صغيرة و لسة بتحيرنى هو “ابو الهول” فين ابنه “الهول”؟ يعنى هو مسافر مثلا؟ ملقاش شغل هنا فقال يسافر يدور على رزقه فى اى دولة اجنبية؟ و لا هو فين بالظبط؟ امه خدته و هاجرت او كدة مش عارفة

فى بقى حاجة بتحصل معانا كطلبة اننا نقوم الصبح من النوم مفنجلين و عنينا اد كدة و مجرد نوصل المدرسة و ندخل الفصل تلاق عينك بتقفل لا ارادياً انت بتبقى عينيك مفتحة عادى و بتبص عالسبورة و سامع حد بيتكلم بس الكلام بيبقى عبارة عن ” عمو حسام كان يملك مزرعة و كان حاصل ضرب 2 و 3 يساوى المزرعة بها حمار و جاموسة و كان البط عنده البلهارسيا فكانت خلايا النباتات تتكون من 25 زائد 14″ و هكذا بقى بس بيبقى على وشك نظرة كدة .. نظرة بلاهة و المدرس اول ما بيشوفها بيعرفك على طول انك نايم و بتصطنع الاستيقاظ عشان المناظر دى عدت عليه قبل كدة و بيتصيد المواقف دى للعيال و بيقوم اول ما يشوف نظرة البلاهة دى بيقوم مستنهز الفرصة لا مؤاخذة و يقوم ظارفك سؤال بقى من اللى هما سمعتهم وحشة زى “اعرب” “علل” “ما النتائج المترتبة” “سؤال رياضة” و بس كدة و بتتهزأ وبعدين تكمل نوم عاادى جدا!

حاجة بقى غريبة كمان انى اشترى بسكويت بنص جنيه اه بس شكله كدة

السؤال هنا مش هو ليه حجمه كدة او ليه وصل للمرحلة دى؟ او مين اللى عمل فيه كدة؟ السؤال هنا ان فى حتة ناقصة فى البتاعة دى مش باينة اوى فى الصورة بس انا عايزة اعرف هما اخدوا منها حتة عشان هى كبيرة اوى و هما خايفين احسن اتخن لو كلتها كلها لوحدى؟ و لا مثلا كان فى موظف جعان فقام لامم البسكوت و اخد من كل واحدة حتة؟ اصل انا كنت جايبة اتنين و نفس المأساة يعنى! دفعت جنيه يا كفرة و فى الاخر طلعت مأكولة قبل كدة تلات مرات اصلا!

اللى عاوز حاجة او كدهون و اللى عنده اى اراء او افكار للحلقات هتلاقونى موجودة عالصفحة عالفيسبوك و على تويتر
و بعدين يا جودعان فى حوار مضايقنى و مثير للدجل ازاى متعملوش لايك للصفحة بتاعتنا عالفيسبوك؟ اتكوا هنا يا جدعان و اعملوا لايك ما تفضحوناش صفحتنا دى اللى هى عليها 20 معجب دى دة انا لو عاملة صفحة لجاستن بيبر كان بقى فيها معجبين اكتر من كدة! ايون انا بستفز شنباتكوا *جاستن بيبر* * جاستن بيبر*

هرد  بقى على بعض التعليقات اللى جاتنى فى ناس بتقولى المفروض اكتب حاجة مفيدة او هادفة المفروض يا حضرات نقرا كل حاجة و بعدين نبقى نحكم عالمكتوب و لما رديت و قلت ان انا بنتقد مجتمع قالوا طالما بتعرضى مشاكل اعرضى حلول لو حضراتكم مش واخدين بالكم ان الانتقاد فى حد ذاته فيه حلول يعنى لو واخدين بالكم ان كل واحد مننا و كل واحد بيقرا التدوينة دى بيشوف نفسه هو بيعمل انهى حاجة فى دول و يحاول يبطلها بعد ما شاف الطريقة اللى انا عرضت بيها المشكلة فبيحس انها مخزية و لو حضرتك مش شايف دة و مخدتش بالك غير من المشاكل اللى بتتعرض يبقى مش مشكلتى انك مش فاهم الفكرة و مش مشكلتى انك مش فاهم الالشة و مش مشكلتى انك قليل الملاحظة و مش مشكلتى انى رغاية تنين برضو و مش هبطل كتابة لحد ما اقول اللى فى فلبى و بعدين لو حضرتك مش عاجبك اللى بكتبه متقراهوش مش لامؤاخذة تدخل تقراه و تموت على نفسك من الضحك و تاخد اللى فيه النصيب و فى الاخر تتفلسف عليا عشان انا لا مؤاخذة الفلسفة دى لعبتى ماشى؟ #حزلئوم_ستايل و بعجين ايه دة اللى اكتب حاجات هادفة و معرفش ايه هو انتم شايفنى كاتبة
حبيبى راح و فاتنى .. و كان شبه الكتاتنى
فلت فى داهية يغور .. دة اصلا
زى سرور
بس على فكرة انا فى الخدمة برضو اللى عايزنى اكتب حب و نحنحة انا ممكن اكتب عادى يعنى
و حوار السواقة و الرخص اللى كان فى الحلقة اللى فاتت و مزعل الناس فقررت اخضع لرغبة الجماهير عشان بيقولوا ان الرجالة متهورين فى السواقة برضو فقررت اخلى القانون 8 رخص للرجالة و 10 للستات برضو مش هرجع فى كلمتى ابدا اول رخصة هتبقى عبارة عن ازاى تقدر تتفادى شخص و الرخصة التانية عن ازاى تقدر تتفادى شخص تانى بقى غير اللى انت لسة متفاديه من شوية تالت رخص بقى ازاى تتفادى -لا مش شخص على فكرة- ازاى تتفادى شخصة بقى يعنى مؤنثة بس كدة بقى و هنشوف باقى الرخص بقى ازاى تتفادى قطة و ازاى تتفادى قط و كدهون هنشوف ناس بتفهم فى القانون بقى   :))

الحلقات التانية هتلاقوها هنا بقى :)

لصفحتنا على فيسبوك اتكى هنا عشان خاطر الوالد

15 thoughts on “ظواهر “مصرية” مثيرة “للدجل” الحلقة التالتة

  1. معالي الباشا قال:

    ههههههه كافيتريا ياحمزاوي
    حلو قوي الحوار اللي بين عنتره وشيبوب وامهم زبيبه
    وكلمه a7a بتفكرني بشله اصحابي كانوا مسمين نفسهم
    جمعيه احه احتين احو
    لا مؤاخذه بقي ممكن تكتبي عن الحب والنحنحه

  2. ahmedsawi قال:

    جميلة جدا جدا

  3. ههاهاههااا مبدعه يعطيكي العافيه
    واكتر ما عجبني موضوع عنتره بن شداد وقصه اليوتيوب .. استمري واحنا في انتظار جديدك !  

  4. غير معروف قال:

    ههههههههههههههههههههههههههههه عاااااااااااش و الله شغل عالي ، ليكي مستقبل

  5. ههههههههههههههههههههههههههههه عاااااااااااش و الله شغل عالي ، ليكي مستقبل
    رد #كبانشي_رئيسا

  6. لجين قال:

    اسكت يا اليهودي من زينك انت ويا وجهك مابلا تعبد الصليب يا كافر

    1-أنامب كافرين انت الكافر تعبد الصليب بعد👎👎👎👎

  7. لجين قال:

    ههههههههههههه طاحت جبهينك

  8. لجين قال:

    لا يا جاستن انا احبك موت 😘😘😘😘😘😘😘😘😘😘😘😘😘😘😘😘😘

  9. لجين قال:

    لا يا جاستن انا احبك موت😘😘😘😘😘😘😘😘😘😘😘😘😘

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s