ظواهر “مصرية” مثيرة “للدجل” الحلقة الرابعة


اول حاجة عايزة اقولها بس فى بداية الحلقة دى “وانتو عملين ايه؟” طويب الحمدلله المهم بقى يا جودعان اكيد فى ناس منكم قرأت كتاب “برما يقابل ريا وسكينة” بتاع عمر طاهر انا شخصيا جبته يوم الاحد و قريته و اعترف ان الكتاب فيه اكتر من فكرة من اللى انا كتبتها هنا انا يمكن تناولتها بطريقة مختلفة شوية بس تقريبا افكار مشتركة كتير اللى عايزة اقوله ان اى حاجة غريبة بشوفها فى الشارع بكتبها كفكرة فى اجندة و بعدين ابدأ اكتبها على هيئة الحلقات اللى بتشوفوها  فعلا انا مكنتش لسة جبت الكتاب لما كتبت الحاجات دى و مكنتش اعرف ايه اللى فيه عمتا انا كنت عايزة اجيب حاجة لعمر طاهر و لما نزلت المكتبة اول حاجة و قعت فى ايدى جبتها و لو حد فيكو كان بيفكر يجيب الكتاب متجيبهوش بقى خلاص لانك تقريبا شفت نفس الكلام هنا بس بطريقة كوميدية اكتر و هات بداله كتاب تانى بس يكون لعمر طاهر برضو بدال ما يعلقنا ولا حاجة و بقيت الاجزاء اللى فى الكتاب اللى انا شايفاها مهمة و حلوة هكتبهالكم هنا فى ريفيو عن الكتاب و لو فى حد عايز الكتاب ممكن اعمله سكان و ارفعه وانزلكو اللينك و محدش يقول لعمر طاهر انى هعمل كدة ماشى؟

اول سؤال مثير للدجل النهاردة بقى هو ازاى حياة الدرديرى عندها 18 سنة؟

فى سؤال تانى برضو متعلق بالكارتون فاكرين طبعا ميكى ماوس؟ كانت البت بتاعته اسمها مينى و بطوط كانت البت بتاعته اسمها زيزى و الوحيد اللى كان سينجل كان بندق او جوفى باللغة الانقليزية بما لا يخالف شرع الله عبدالرحمن اخويا بيقولى ان مينى مكنتش صاحبته دى كانت اخته بس انا مش مقتنعة المهم بقى نزل فيلم بعد كدة لجوفى و ابنه لوحدهم يعنى شوفو الدنيا سبحان الله ميكى و بطوط اللى مصاحبين متجوزوش و لا خلفوا لكن جوفى السينجل خلف لوحده كدة؟ خصوصا ان مراته مكنتش فى الفيلم تفتكروا بيبيض؟ بس نتعلم ايه من الكارتون دة؟ ان اللى بيصاحب مبيتجوزش فى الاخر بس كدة

بالنوسبة للاغانى بقى العادية اللى هى مش مهرجانات

كان فى اوبريت الحلم العربى فى جملة غريبة اوى كانت بتقول “حضن يلمنا كلنا كلنا” كان نفسى اعرف مين صاحب هذا الصدر الواسع اللى هيلمنا كلناا فى حضنه و من كام يوم اكتشفت من هذا الشخص ذو الصدر الحونين و طلع الفنانة القديرة “مروى” يا جماعة الست دى تعبت معانا اوى و دايما بترفع من معنوياتنا و احنا مش بنقدر دة و مستكترين عليها التكريم انا شخصيا لما امسك الرئاسة باذن واحد احد هعمل ميدان باسمها و هيبقى ليها تمثال فيه و هنعمله فى اكبر شارع فيكى يا بلد “شااارع الهرم” وش يعنى و كل يوم بقى تلاقى اخبار عن تظاهرات للراقصات و العوالم و الذى منه فى ميدان “مروى”

فى بقى اغنية اراقت مش المصريين بس بل كل علماء اللغة فى العالم ليفكوا شفرة الاغنية لدرجة ان اسرائيل كانت عاملة قسم فى المخابرات و مسمياه “كاتش كاتش فى الالولو” كانوا فاكرين اننا بنبعت شفرات لجواسيسنا عندهم من خلال الاغنية دى الاغنية كان بيغنيها محمد فؤاد و بيقول فيها “كاتش كاتش فى الالولو كمان نانا” و مين كمان نانا دة؟ اتحدى اى حد يترجملى الاغنية بتقول ايه و زيها بالظبط الاغنية حديثة العهد بتاعت تامر حسنى و بيقول فيها “البيسى بيسى بيسى ابعد كدة عن قميصى .. البيس بيسى بيسى قول يا شقلشة!” المقطع الاول مفيهوش اى مشكلة انا اللى معصبنى مين شقلشة دة؟ و كان بيلعب فى قميص تمورة ليه؟ هو القميص اوريدى مفتوح لوحده بيلعب فيه ليه؟ يعنى هو تمورة فاتح القميص عشان محدش يلعب فيه و شقلشة مصمم برضو لييه؟ ليه؟ ليييييييييييه؟ #شوبير_ستايل

و خد بقى من دة كتير زى ثلا واحد يقولك “جو جو جو جو جو جو جو جو جو” الاغنية كلها عبارة عن “جو جو جو” اى “اذهب اذهب اذهب” طب افرض انا فى السكة مش لازم تصدعنى يعنى اول ما اوصل هرنلك و لا ايه؟

فى اغنية تانية بتغنيها واحدة اسمها هدى انا استنتجت اسمها من الاغنية بتقول “حبيبى ماله” و فى كورس وراها بيقول ” ماله يا هدى؟” فتقول “وحشنى” الكورس يقول “يا لهوى” فتقول حاجة تانية على نفس القافية بس انا مش فاكراها فالكورس يقول “يا لهوى” و هكذا بقى على باقى الاغنية يا لهوى يا لهوى لما يخلوك تولول طول ما انت فى الشارع عذااب يعنى و احنا مالنا بعلاقتها المدّمرة دى؟ انا مالى يا ماما يوحشك ولا يحرقك بجاز يا رب يطلقك يا شيخة عشان تقولى “حبيبى ماله؟” “ماله يا هدى” “طلّقنى” و يقولوا “يا لهوى” كويس

فى بقى عندك المثل بتاع “اجرى يا بنى ادم جرى الوحوش يا هتلحق الميروباص يا هتلحقه برضو لانه فاضى اصلا” دى حاجة مثيرة للدجل انك تبقى رايح تركب ميكروباص و تلاقى الناس بتزاحم عليه و هو فاضى و فى 10 غيره هل هما اتعودوا مثلا و مبقوش يقدروا ميزحموش؟ انا مش فاهمة  و عندك بقى ذاك الشخص الكبير فى السن اللى بيبقى عايز يركب فانت بتوسع له يركب قبلك عشان هو حد كبير و كدة و حراام يقعدوا يزنقوه و كدة يقوم الراجل الكبير دة اكتر من مرة زاققك و راكب بيبقى بقى لسان حالك بيقول “انا اللى وسعت لك على فكرة انا لو كنت نفخت فيك كنت وقعت عالارض اصلا” السؤال بقى هو ليه بيعمل كدة؟ هو عنده عقدة نقص عشان كل لما ييجى يزاحم الناس بتضربه و مبيعرفش يركب فلما لقى الميكروباص فاضى قام قافز فيه عشان يحس انه قوى و بيعرف يزاحم و يركب؟

عندك بقى برضو الشخص الغريب اللى بيبقى شايف السواق عمال ينده “محطة مصر محطة مصر” و ييجى يقوله “محطة مصر دة يا باشا؟” المطلوب السواق يعمل اي؟ مرة السواق قاله “لا مش محطة مصر” قام الراجل قال” ما انت كنت بتنادى دلوقتى محطة مصر” السواق اتعصب عليه و قلبت عركة و فى بقى الشخص الغتت اللى هوا بيسأل عكس المكان اللى هو رايحه يعنى ييجى للسواق مثلا يقوله “سموحة دة يا كابتن؟” السواق يقوله “لا دة منشية” يقوم راكب مرة ابن خالى عمل كدة السواق قاله “انت مش قلت رايح سموحة؟” قاله “لا انا كنت بسأل عشان لو سموحة مركبش” قالى الجملة دى وشرد و متكلمش تانى انا استنتجت انه اتقطّع

الصورة دى مسروقة على فكرة بس مش فاكرة سرقتها منين ^^^^

حاجة اكتشفتها حديثا و حقيقى مكنتش عارفاها ان الكلمة الابيحة اللى اتكلمت عنها فى الحلقة اللى فاتت “ا*ا” دى مطلعتش ابيحة ولا حاجة هى طلعت اختصار لجملة “انا حقا اعترض” او ممكن تكون “انا حقا اعترض” هى اللى اختصار للكلمة الابيحة السؤال دة بيلح عليا مين اللى جه الاول؟ ال “ا*ا” ولا ال “انا حقا اعترض” #على وزن مين الاول الفرخة ولا البيضة يعنى تخيل حد يضيع عمره عشان يعرف الفرخة ولا البيضة على فكرة اصلا مينفعش يكون فى فرخة الاول لانها مش هتبيض لوحدها لازم يكون فى ديك ومينفعش تيجى البيضة لوحدها برضو فى الاول لانها هتحتاج برضو ديك او فرخة على حسب النوع. يبقى السؤال الاصح “مين الاول؟ فرخة وديك ولا بيضتين مختلفين؟ و برضو مش هتلاقى اجابة فى الاخر وش يعنى

 

احنا الدولة الوحيدة اللى الناس بتقول على سان ستيفانو “سان ستيفسو”  و حمع لاب توب “لابتوبسات الشعب الوحيد اللى حلوانى “لا بوار” بنقول عليه “لا فوار” .. فوّار ازاى يعنى لا مؤاخذة انت عندك حموضة برضو احنا الشعب الوحيد اللى بنقول على “اندر تايكر” “اندر تكة” و “تريبل إتش” بنقول عليه “دوبل ايدج”

هتكلم بقى عن وجودك داخل الميكرباص او اتوبيس النقل العام مثلا لو كان معاك كتاب و حبيت تقرالك كلمتين تلاقى تلاقى الراجل اللى قاعد جنبك عايز يعيط من كتر الضحك عشان انت ماسك كتاب وفى نفس الوقت بتلاقيه عين امه مبتطلعش من الكتاب طول ما انت بتقراه بيبقى شكله عامل كدة بالظبط:

 

 ولو انت بصيتله باستغراب تلاقيه بيبصلك عادى بكل بجاحة كدهون:

و عندك بعد كدة بقى عمو اللى بيبقى معاه موبايل نوكيا الناطق دة اللى انا مش عارفة موديل كام و كل ما تضغط على رمز ال “*” يقعد يقول الساعة و الراجل بقى بيبقى منبهر يا عينى و مش قادر يبطل طول السكة عمال يتكى عال “*” عشان الموبايل يتكلم و الناس اللى حواليه تتفرج عالامكانيات و يتحسروا على نفسهم عشان معندهمش موبايل زى دة

فى حاجة بقى دايما بستغربها فى العيال وزمايلى فى الفصل ايام الامتحانات ببدأ احل الامتحان واخلص و العيال ماسكين الورقة ونازلين كتابة و اسال المستر “هو الامتحان ورقة واحدة و لا اتنين”؟ و بيبقوا عاملين كدة:

 

فى حاجة مريبة اخيرة بقى قبل ما نختم الحلقة حاجة مستوحاة من @3mr_

بس تحذير اللى عنده القلب او السكر او كدة متقراش

ليه عندنا نواب مجلس الشعب بيبقى عندهم حصانة؟ يعنى ليم مش بقرة او جاموسة؟ #الش_بن_كلب

و صلنا بقى لفقرة الدعاية و الاعلام :))

المرة اللى فاتت استفزيتكو عشان تعملو لايك عالبيدج و فعلا حققنا المطلوب و بقوا اللايكرز 44 بدل ما كانو 20 المرة دى بقى هنستخدم الاعلانات و هنستخدم افكس اعلان استُخدم فى تاريخ مصر

عايز تشوف نفسك فى الكوشة؟ نفسك تلبسى الفستان الابيض؟ انت و انتى على بعد خطوات من الحصول على عريس/عروسة الاحلام اتبعو الخطوات الاتية فقط و لكن بكل حذر و الا لن يحدث شئ

1- اضغط هنا و اعمل لايك على هذه الصفحة

2- اعمل شير لصفحتنا على حوائط اصدقائك فى عشرين بوست مختلف

3- اضغط هنا و اعمل فولو لهذا الاكونت على تويتر و على فكرة مش هتندم لو معملتش فولو

4- منشنلى بقى و قولى انك عملت هذه الخطوات و انا هجيبلك عروسة/عريس لوز الجوز

انا شخصيا بدعم الحملة الرئاسية للمعلم كبانشى او البشمهندز محمد جعفر شفتو مرشح اتنين فى واحد يعنى هيساند العمال و يساند البشمهندزين وبعدين الراج دة يا جماعة عنده خطط وبرنامج رئاسى واضح كالتالى:

كبانشى مش بتاع شعارات .. كبانشى هيركبكو عربيات

عندك مثلا هيغير السلع التموينية و هيلغى الشاى و يحطلكو بداله كابتشينو من اللى بيعمل شنبة

يا جماعة الراجل دة احلامه كتير بس احنا نديله فرصة .. صوتكم لكبانشى .. كبانشى هو الحل

بيقولك مثلا هيعملكو ميدان لحسنى مبارك و يسميه “تف تفة و روح خدلك لفة” و عيعلق فيه مبارك و عياله عشان كل ما تعدى من عند الميدان دة تتف تفة لحد ما مبارك يموت غرقان و خد من دة كتير بقى و تلاقيه بيقرا التدوينة دى دلوقتى حد يصدق ان رئيس الجمهورية يقعد يقرا هزيان الشعب دة؟ حسة انى عايزة اعيط و لا ابكى اهئ اهئ اهئ #هنيدى_ستايل ..  انا اعطى صوتى لمن يحترمنى ويحترم هزيانى ادعمو كبانشى فان لم تفعلوا فاعلموا ان قلة فولورزاتكو هى التى منعتكم

لمن لا يعرف كبانشى هو هذا الشخص @Kabanshy

, ها هى بعض لافتات حملته الانتخابية

بالمناسبة انا فى ناس قالتلى اقلل شوية من حجم الحلقة و ناس قالتلى ازود فانا مش عارفة بقى الحل ايه دلوقتى؟ نعمل تصويت :)

شكرا :) اشوفكو الحلقة الجاية و عليكو خير

الحلقات التانية هتلاقوها هنا بقى :)

و متنسوش على فكرة فى صفحات فوق اهه ممكن تبصو عليها و فى صفحة البداية دى فيها كل التدوينات

 

13 thoughts on “ظواهر “مصرية” مثيرة “للدجل” الحلقة الرابعة

  1. جميله جدا :) مازالت التلقائيه وترتيب الافكار اكتر حاجه بتعجبني في ظواهر مصريه مثيره للدجل ، الجزء ده كان اكتر تركيز وفيه تلقائيه اكبر .. ويل دان :))

  2. 3mr قال:

    بحملك مسؤولية كل أنفولو من النهارده xD
    حلقة جامدة فشخ :D

  3. joo قال:

    حلوووووووووووووووووووووووووووووووووووووووووووووة زودى الرغى وانا عملت اعلانات ومش اخت عروسة عايز عروسة

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s