ظواهر “مصرية” مثيرة “للدجل” الحلقة الخامسة


الحلقة الخامسة

المسلسلات التركى و تأثيرها فى المصريين عندنا هو اكثر المواضيع دجلا فى هذا القرن و عشان كدة قررت اكلمكم عنو و اقولكم انا بشوف حلقات المسلسل التركى عاملة ازاى انا ببساطة بشوفها حلقة واحدة بس بيكرروها و بيغيروا الديكور و احنا عشان بننسى بطبيعتنا فمبناخدش بالنا ان هى نفس الحلقة عشان كدة حتى تلاقى الناس اللى بيعملوا الدبلجة هما هما نفس الاشهاص اللى بيعملوا دبلجة كل المسلسلات السؤال بقى هما مبيتعبوش؟ لا طبعا مبيتعبوش لانها نفس الحلقة فمما بيعملوها مرة واحدة و المونتاج بيظبط الباقى فى الكام صورة الجايين دول انا بصور لكو انا ازاى بشوف المسلسلات دى:

بالنسبة للطلاب بقى اللى لازم كلة نقول حاجة مثيرة للدجل فيهم انهم مثلا لو فى يوم مثلا حد جه وقال للفصل ان المدرس غايب تلاقى العيال زاطو و اتبسطو اوى تحس ان المدرس كان بيعذبهم دا لو كان عيالهم فى ثانوية عامة و نجحوا مكانو هيفرحوا الفرحة دى و بتلاقى كل مجموعة بتحتفل بطريقتهم بتلاقى ناس كدة

وفى ناس كدة:

و فى ناس كدة:

و فى انا:

احنا كمصريين دايما مترددين يعنى مثلا عملنا ثورة و بقالها فوق السنة و مترددين نكملها ولا كفاية كدة بس الصفة دى بتتجلى اوى فى اى شخص بيسوق و الشخص اللى بيعدى الشارع يعنى لو انت بتعدى الشارع و حد راكب العربية تيجى تعدى يقوم هو متحرك تيجى تقف يقوم هو واقف تقوم انت تعدى على اساس انه وقف يقوم هو متحرك طب ايه يعنى هتدوسنى ولا اعدى؟ ولا اقولك دزسنى و خلصنى انا تعبت اصلا و انبى لا انت دايسنى و تفضل بقى انت و هو كدة و لا انت عارف تعدى الشارع ولا هو عارف يطلع و ساعات بقى فى ناس بتبقى هبلة يقولك خلاص عدّى و تيجى تعدى يقوم طالع برضو و الحركة دى بتحصل برضو لو فى شخصين جايين فى وش بعض و الشاارع واسع يعنى تجيله شمال يجيلك شمال تجيله يمين يجيلك يمين اكيد كلكو حصل معاكو احد المواقف

بالنوسبة بقى ان كلكم عجبكو الجزء بتاع عبلة و عنترة انا لقيت جزء فى الكتاب فيه حوار دار بينه و بين عبلة بس دة حوار واقعى انا مش مفتكساه زى التانى

عنترة: يا عبلة يا حبيبتى اتكلمى بقى نفسى اسمع الكلمة دى منك
عبلة: نهيين؟ نهوون؟
عنترة: بقولك ايه بروح امك عالصبح انتى فاهمة انا بتكلم على ايه؟ انتى هتعمليهم عليا؟
عبلة: اقطع دراعى لو كنت فاهمة حاجة يا عنترة يا بيبى
عنترة: انا سمعت انك ماشية مع الواد السيس عمارة بن زيادالناس كلها بتتكلم
عبلة: سيبهم يتكلمو يا دارلينج انا و عمارة هنتجوز خلاص كلها كام شهر
عنترة: عبوكو كلكو تتجوزى مين يا بت؟ دة انا اجيبهولك فى شوال يوم الدخلة
عبلة: مين؟ ياض انت مصدق ان العضلتين اللى انت نافخهم دول هايجيبو نتيجة
عنترة: ماشى خليهم يسوقوكى زى الأمة لحد بيت عمارة و برضو هجيبه فى شوال
عبلة: امة؟ الامة دى تبقى امك يا عنترة متنساش اصلك *الامة دى اللى هى الجارية يعنى*
بس و سابته و مشيت بقى و عزلت من القرية خالص بصو هو فى اجزاء واقعية و اجزاء مفتكسه و غيرت شوية فى اللغة يعنى من الاخر محدش يجرب يفتح الكتاب و يدور عالجزء دة م..مش هتلاقوه

مشكلة كمان بتواجهنى فى مصر هى مشكلة المواعيد يعنى لما تيجى تحدد ميعاد مع حد و يقولك بعد العصر ايوة ما هو بعد العصر دى معاك لحد المغرب او العشاء او لما حد يقولك لما اوصل هرنلك طب ما انت هتوصل امتى يعنى؟ بس اكتر ما يضايقنى بقى هو الشخص اللى يتأخر و تقوله متأخر ليه يقولك “سورى” سورى يا قلب ماما؟ فتعيد السؤال على مسامعه السيس اتأخرت ليه يقولك “انا اسف” تقريبا هو فهم انا مبعرفش انجليزى ..يابنى ايوة بيظل السؤال ايه اللى اخرك؟ يقولك “معلش” لا انت كدة هتخلينى اتهور الصفة دى فى كل المصريين احب اقولكم ان “اسف” “سورى” “معلش” دى مش اجابة للاسف

نرجع للطلاب بقى و هقولكم حاجة مثيرة للدجل و انا شخصيا باعملها و اللى لفتت نظرى ليها هى ميس العربى احب اهديلها الفقرة دى من الحلقة
مرة كنا قاعدين فى الحصة و انا كالعادة مش مديالها ودن خالص و بكلم العيال و بألش و كدة و زايطة يعنى عشان انا مش شايفة لمدرسين العربى اى لازمة لسببين 1- اننا اصلا مبنذاكرش عربى 2- ان احنا لما بنيجى نذاكر ليلة الامتحان بنقرا الدروس و ننجح رغم اننا مش بنسمع الشح يبقى نجيب مدرسين عربى ليه؟ ونكلف الدولة و نخرم عجلة الانتاج المهم يعنى و انا بتكلم قالتلى “بس يا مىّ بطلى كلام” فبصتلها بصة بريئة و كأنى اتفاجئت بكلمتها و قلتلها “انا؟”

اصلا مفيش مىّ غيرى فى الفصل قالتلى “انتو ايه حكايتكو كل ما اكلم واحدة تقولى انا؟ كأن مفيش حد بيتكلم و انا بتبلى عليكو” الست بصراحة صوعبت عليا فقررت اقولها اللى فيها و فى نفس الوقت اسكتها و الهيها عن الموضوع فقلتلها “يا ميس ما هو لازم نعملك نظرة البلاهة و نتكلم ببراءة فحضرتك تتغاضى عن الموضوع” الست بصتلى باستعجاب وراحت مكملة شرح واضح انها فهمتش انا بقول ايه و اتحدى ان اى حد فيكو فهمها برضو

حاجة مثيرة للدجل برضو فى الشعب المصرى ان بعد سنة و اكتر على الثورة و شوفنا كتير لحد انهاردة مش عارفين نفرق بين الدبابة و المدرعة!

مصر هى الدولة الوحيدة اللى نمر العربيات فيها بتكون كلمات سبحان الله
يعنى تلاقى “س ر ق” “ن ه ب” “ه ر ب” كلها كلمات اعوذ بالله

ليه الدروس اللى مقرر ندرسها اسمها “منهج”؟ عشان بتخلينا ننهج و احنا بندرسها مثلا؟ #الش_ملعون

ساعات تلاقى واحد قاعد ماسك مسبحة فى ايده و عمال يسبح و نازل رغى فى نفس ذات الوقت اموت و اعرف بيعملوها ازاى ولاد اللعيبة؟

و يا سلام بقى لو عندك ضيف و تقوله تشرب ايه؟ يقولك اشرب حاجة ساقعة .. يا راجل؟ طب ما فيه حاجات كتير ساقعة انا ايش عارفنى انهى واحدة يعنى المفروض يحدد موقفه مش يسيبها عايمة

فى اغنية كدة بتاعت اطفال كانت بتقول “يا اصحابى و صحباتى هنا و محلك سر” الجملة دى فى حد ذاتها لحد انهاردة ملهاش معنى بس المسكلة الاكبر فى الجملة اللى جاية لما بتقول “شوفو لا مؤاخذة حاجاتى انما ايه فى السر” ليه هى حطت “لا مؤاخذة” هى هتقول حاجة مش كويسة مثلا و بعدين حاجات ايع اللى هتوريهالهم “لا مؤاخذة” و “فى السر” يعنى الواحد بيبقى بيسمع و الفضول هيقتله و فى الاخر هى بتفاجئنا و تثبت لنا كلنا ان دماغنا وحشة و ان هى قصده شريف و برئ و تقولك عندى فرشة مش عارف ايه و عروسة بتعمل ايه فى اللحظة دى بتبقى حاسس انك عايز تردح لها من الاخر

اخر حاجة بقى انهاردة ان حاجة غريبة فينا احنا الشعب المصرى اننا بنحب نشوف الفيلم اكتر من مرة لحد ما نحفظه و اول ما نحفظه بنحب نسمعه تانى عشان نسمّعه . احنا بالظبط عاملين زى الشخص اللى بيروح السينما و لقى ان الفيلم عبارة عن مشهد واحد عمال يتعاد و كل الناس اللى حواليه طلعوا و سابو الفيلم و زعقوا و اخدوا فلوسهم و هو الوحيد اللى كمل فيلم للاخر و اول ما الفيلم خلص طلع جاب تذكرة تانية و دخل تانى مبنتعلمش من اللى فات و بننسى او بنتناسى المهم اننا مش بنتعلم من اخطائنا و دة بيأثر فى قرارات كتيرة فى حياتنا

الحلقات التانية هتلاقوها هنا بقى :)

لصفحتنا على فيسبوك اتكى هنا عشان خاطر الوالد

4 thoughts on “ظواهر “مصرية” مثيرة “للدجل” الحلقة الخامسة

  1. غير معروف قال:

    جامد

  2. غير معروف قال:

    جامدة جدا وخصوصا مدرسة العربى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s