ظواهر “مصرية” مثيرة “للدجل” الحلقة السادسة


الحلقة السادسة
تعالو نبدأها بالتلفزيون و الحاجات العجيبة اللى عليه
الاعلانات فى اعلانات اثارت دجل مصر و الوطن العربى و اوروبا و الدول المتقدمة زى اعلان بونبوناية ميميكس بونبوناية فجولة فجولة.. يعنى ايه فجولة؟
عندك اعلانات كوتونيل دى بجد غريبة جدا يعنى مش ناقص غير انهم يجيبو الملابس الداخلية بتتكلم و تبقى كملت

فى عندك اعلان بتاع كريم كدة اسمه سباركل باين مش فاكرة بس اللى فاكراه الاغنية بتاعته بيقعد يقولك “قول قال ايه شعري بيرقص ليه” و بعدين مش فاكرة بيقولو ايه و بعدين يقولك “دة كريم بزيت الايه؟ دة كريم بزيت المينك” يا واد يا جامد ايه المينك دة بقى؟ و لا احنا هننبهر كدة عشان مش عارفين المينك دة عبارة عن ايه؟ اقطع دراعى -بهرج طبعا- ان ما كان المينك دة هو المية بتاعت الترمس طول عمرى بسمع ان مية الترمس بتخلى الشعر حلو .. ناس غريبة

الاعلان بتاع اتصالات اللى بييجى فيه واد يقولك “دة بوب الهاشتاك” مين الهاشتاك دة عدم اللامؤاخذة؟ أنا بقيت بمشى فى الشارع الناس تقولى يعنى ايه هاشتاك لدرجة ان اخويا قاللى يعنى ايه بوب الهشتكةّّ قلتله يعنى بيعرف يلاعب الاطفال كويس و يهشتكهم

سيبك انت من التلفاز و خلينا فى المواصلات و النقل العام و الذى منه
الحاجة المثيرة للدجل ان كل السواقين بتوع الميكروباصات او المشاريع كما يقولها المصريين الاصليين مش العالم السيس اللى زينا تلاقى ذوقهم واحد فى المزيكا بتتراوح من اول المهرجانات لحد الفنان العالمى جورج و سوف و كلها بتبقى أغانى عجيبة حزاينى كدة عن الخيانة و الناس الغلابة و الغابة و الديابة و مليانة كلمات تقطع القلب اه و الله بس بما اننا جبنا سيرة الحاج  جورج وسوف السؤال هنا بقى ليه دايما “جورج” بيتصدر الشاشة و “سوف” عمره ما بيظهر يعنى فى الكليبات و الاغانى دايما بيبقى جورج هو اللى بيغنى و هو اللى بيصور الكليب طب ليه سوف ميطلعش فى كليب واحد عالاقل؟

حاجة كمان لاحظتها اننا دايما بنحاول نقرا اللى ورا السطور فى أى منتجات اجنبية زى كوكا كولا كان يقولك لو مسكت الازازة ادام المراية هتلاقى مكتوب “لا محمد  لا مكة” و كنت و أنا صغيرة لازم أى ازازة كولا فى البيت احطها عند المراية و عمرى ما  قدرت افك الطلاسم اللى بيقولو عليها يمكن مكتوبة بحبر سرى؟
طب فى علمكم بقى انا اكتشفت حاجة ان جوجل كان عنده نية زى الزفت لما عمل جوجل “كروم” واخد بالك انت؟ “كروم” كروم دى اللى هى حدائق العنب و النبيذ بقى و كدة عايزين يكفرونا .. و بيبسى كمان ليهم خلفية سياسية عشان بيدعموا ابو اسماعيل عشان مامته امريكية و كدة بص كدة PEPSI , P= Put E=Election P=Posters S=Supporting I=Ismail ها ايه رأيكم؟ صدقتونى؟

بالمناسبة هو الشيخ حازم عنده ابن اسمه اسماعيل و لا عامل زى ابو الهول كدة اشتغالة يعنى و طلع معندهوش ابن اسمه الهول و لا حاجة

بمناسبة مرشحين الرئاسة انا مش فاهمة انتو ازاى تنتخبوا حمدين صباحى؟ أيوة انا مقدرة انه فى منه منفعة لان لو “حمدى” تعب هيبقى عندنا “حمدى” تانى بس يا جماعة دة “صباحى” يعنى هضطر تنتخب واحد تانى يمسك الفترة المسائى عيب عليكم حتة مهمة زى دى تفوت عليكم

احنا اصلا كنا بنتكلم عن المواصلات مش كدة؟ نرجع تانى بقى لموضوعنا بالنسبة لاتوبيس النقل العام ليه بيبقى بطئ كدة بجد؟ و يوم ما بيبقى سريع بيبقى بيمشى بسرعة 2 كيلو فى الساعة و بيبقى بينهج يعنى و يا سلام لو السواق اتهور عليه و زود السرعة شوية ممكن العجلة تروح فيها لدرجة ان مرة الاتوبيس خد من المديرية لحد ميدان سموحة فوق السبع دقايق للى ميعرفش انت لو خدت الحتة دى مشى تاخدها فى خمس دقايق اصلا

برضو حاجة غريبة تلاقى اتوبيات نقل عام كتيرة مكتوب عليها “مكيف” بس سبحان الله عمرهم مبيشغلو التكييف دة و لا قصدهم مكيف يعنى بيكيف الواحد عشان بتقعد تشم ريحة البنزين لحد ما تعمل دماغ؟

سواق النقل العام برضو دايما معصوم من الغلط يعنى لو خبط عربية او كدة يبقى صاحب العربية هو اللى كان راكنها غلط يعنى كنت فى اتوبيس مرة و السواق زنق على سواق اتوبيس تانى بس مش نقل عام و كسر له المراية و الركاب بقى قعدوا يزعقوا للسواق التانى و يقولوله تستاهل انت اللى زنقت عليه و يقولو لسواق بتاعنا اكسر له المراية يا عم ميهمكش دة هو اللى غلطان و أنا شايفاه بعينى هو اللى زنق عليه
و مرة تانية كان واحد فى عربية ملاكى و فاتح الباب عشان هينزل قام التانى داخل بالاتوبيس فى الباب قعدوا برضو يزعقوا للراجل و يقولوا انت اللى غلطان طب و هو الغبى اللى جاى مش شايف ان فى باب مفتوح يخلى باله؟ و قعدوا يقولو للراجل محصلش حاجة يا عم الباب زى الفل و الباب مكنش بيقفل اصلا الراجل يا عينى قطع الخلف
فاحسن لك لو سواق اتوبيس نقل عام خبطلك عربيتك استعوض ربنا فيها لسببين واحد ان فى ملايين هينزلو من العربية مش هتعرف دول كانوا راكبين جوا ازاى و ممكن يقطعوك ,واتنين انك لو حاولت تاخد اى اجراء قانونى الناس هتقف مع السواق و هيبقى حظك حلو اوى لو لقتنى كنت فى الاتوبيس دة هتلاقى حد فى صفك عشان سواق النقل العام مبيغلطش

حاجة بقى فى المدرسة بواجهها ببقى قاعدة فى الحصة مش فاهمة أى حاجة و بعدين الاقى العيال بتسأل و بتاع فأقول يااه ليه يا رب مخلتنيش ذكية زيهم و بفهم من المدرسين العجيبين دول بس دايما بكتشف انى غلطانة لانى أول ما بركز فى السؤال و ابدأ استفسر و استوعب بلاقيهم بيسألو اسئلة غبية جدا يعنى دايما بتكون نوعية عبيطة من الاسئلة يعنى يقولك مثلا طب ميس اكتب بالقلم الاخضر و لا الازرق لا طبعا مش اوى كدة بس فعلا انا مفيش سؤال بيحضرنى دلوقتى بس بيبقى سؤال تافه بيوضح ان كلنا فى مركب واحدة و محدش فاههم حاجة ممكن مثلا لو فى حصة Math يقولك استخدم انهى خاصية فى الالة الحاسبة عشان اجيب النتيجة دة حتى سؤال ذكى شوية و الله سيبك انت ….
حاجة كمان بقى لما دايما الامهات و الابهات لما ييجوا يحفزوا ولادهم للمذاكرة يقولوهم دة انا طول عمرى كنت بطلع الاول .. يعنى اشمعنى الاول؟ مكنش عندكو ترتيب ابجدى؟ كان كل الفصل بنفس الحرف فمكانوش عارفين يرتبوكو؟ يعنى أنا كنت دايما فى ابتدائى عشان اسمى مىّ فبيبدأ بالميم كنت بطلع التالتة حتى لو جايبة نفس مجموع الاولى وساعات كنت بطلع الاولى طبعا ;) بس دى مش مشكلتنا مشكلتنا لو كل اولياء الامور بيطلعو الاول طب مين بيطلع التانى؟ بلاش مين كان بيطلع الاول مكرر

اخر حاجة بقى انهاردة عشان نسيب شوية ظواهر للمرة الجاية ;) دايما الفانز بتوع اى مغنى بيتبطوا اوى و يحسوا بالفخر لما المغنى بتاعهم يعمل اغنية مع مغنى اجنبى و يحطو صوابعهم فى عين اتخن واحد بيهاجم المغنى دة و يقولك اصلا دة عالمى .. اولا بحس ان دايما بيجيبو مغنى من حوارى امريكا يعملو معاه اغنية يعنى عمرى ما شفت حد عمل اغنية مع سيلين ديون (من كندا خلو بالكم) ولا مايكل جاكسون مثلا .. و الفانز دول ذات نفسهم بيبقوا اول مرة يسمعو عن المغنى دة بس هما بيزيطو و خلاص
و اعملوا لايك عالبيدج بقى فضحتونا الناس بتضحك عليا الاسم بس مش عارفة كام متابع و مفيش متابع يوحد ربنا على فيسبوك عيب عليكو اخص اخص اخص
بس كدة شكرا :) اراكم فى الحلقة القادمة يا اصدقائى #عالم_سمسم_ستايل

عايز الحلقات التانية؟ اتكى هنا و حياة الحاجة

مش عايز الحلقات التانية؟ متتكاش هنا و حياة الحاج

برضو مصمم و مش عايزها؟ براحتك على فكرة مش هتندم لو مقريتهاش

لصفحتنا على فيسبوك اتكى هنا عشان خاطر الوالد

4 thoughts on “ظواهر “مصرية” مثيرة “للدجل” الحلقة السادسة

  1. memo قال:

    والله كلام جامد في نقد بناء حلو اوي
    بس ياريت متعيديش نكتة جورج وسوف عشان انا اتمغصت وانا بقراها
    بس مككن طلب
    عايزين نعرف انتي مين وبتدرسي ايه وسيبي نشر البيج عليا :)

    • balad3agayeb قال:

      هههههههههه :)) اتمغصت بس؟ دة فى ناس بيجيلها سرطان من الألش احمد ربك انها جت على اد كدة .. و الله مفيش حاجة تتقال يعنى و بالنسبة ل”بدرس ايه” فأنا بدرس فى مدرسة زى كل الاطفال اللى فى سنى :)) و أى معلومات تانية موجودة عالاكاونت على تويتر .. شكرا :)

  2. hisham kanayati قال:

    كلمة فجولة اعتقد متاخده من كلمة visuals يعني بيشوف تهيؤات او حاجات غير حقيقية visualizations
    يعني مش عارف البونبوناية دي فيها بانجو ولا ايه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s