ظواهر “مصرية” مثيرة “للدجل” الحلقة السابعة


بما اننا فى موسم الامتحانت نبدأ باكتر الاشياء اللى بتضايق الطالب و تطلع عفاريته تبقى قاعد فى امان الله بنزيط فى أى حاجة و يجيلك أحد الوالدين و يقولك قوم ذاكر الكلمة دى تأثيرها بيبقى وحش أوى عليك  فأحب اوجه رسالة لاولياء الامور و اقولهم ” فى حديث بيقول “حب لاخيك كما تحب لنفسك ” آساحبى .. انت كنت تحب ابوك يقولك كدة و انت صغير؟” سيبونا فى حالنا بقى لقد هرمنا

و عمك المراقب بقى فى اللجنة تبقى انت مخلص كدة بالصلاة عالنبى و عايز تطلع بدرى و يقولك اقعد يا ابنى و اكتب كل اللى تعرفه, متخرجش بدرى يمكن تلاقى نفسك سايب حاجة.. أنا لو اعرف حاجة يا حاج كنت كتبتها هو انا هخبى عالمصحح ليه؟ ايه مصلحتى؟ انا لو عندى معلومات تفيدكم كنت اعترفت بيها آآسديكى!

دى بقى حاجة لاحظتها فى اصحابى .. كل سنة بعد الامتحانات يقولك هنخر تقولهم هتعملوا ايه؟ بتلقى خطتهم كالآتى:

1- الذهاب الى الماركت لشراء الحلويات

2- التوجه الى المول للف حبتين

3- الهجوم على أحد المطاعم لافتراس بعض الاطباق

4- نروح أى كافيه عشان نحبس بقى

5- نجيب ايس كريم بقى عشان نقفل اليوم

و لاحظت ان مش الشلى بتاعتنا بس هى اللى بتعمل كدة .. السؤال هنا بقى هما كانو مجوعنكوا فى البيت و لا ايه؟

بالنسبة لموضوع مبارك اللى بيحتضر كل اسبوع تلات مرات عالاقل دة! هو كل ما يتزنق بيحتضر يعنى؟ و لا دى الطقوس السنوية بتاعته؟

حاجة تانية مثيرة للدجل فى مصر ان كل واحد مش بيخليه فى شغله و بيحب يتدخل فى شغل التانى يعنى عندك اكبر دليل الراجل اللى بنى مصر كان حلوانى! ما كل واحد يخليه فى حاله انت حلوانى روح اعمل كنافة و قطايف يا عم و ملاكش دعوة بتخطيط مصر تانى عشان انت خربتها

برضو دلائل تانية على حبنا اننا نحشر نفسنا فى خصوصيات الاخرين يعنى تتعرف على شخص جديد كدة و تبقى قاعد مرة و يقولك ممكن اشوف موبايك؟ فانت بكل براءة تقوله اتفضل و مجرد انه يمسكه فايده تلاقى بقى الرسايل اتفتحت و الصور و حاجة فضيحة و لو كلمته و قلتله متفتحهمش لو سمحت يقولك ” و هما ايه اللى جبهم هنا؟” يا عم انا شخص بحب احط حاجات ابيحة على موبايلى انت مال اهلك؟

عندك بقى موظفين الحكومة دول بقى عايزين يتفجروا مش كلهم طبعا بس معظمهم و اكتر حاجة بتثير الدجل فيهم انى ببقى عايزة اعرف هما بيشتغلوا امتى؟ لا بجد يعنى كل الموظفين اللى اتعاملت معاهم بيبدأول شغل الساعة 8 و يخلصوا 12 يعنى 4 ساعات و طبعا دول بيبقى ضمنهم ربع ساعة تأخير و نص ساعة فطار غير كوباية الشاى و بغض النظر طبعا عن ساع و نص رغى همالين بيسألو بعض عالولاد و امتحانت الولاد ناهيك بقى عن الذهاب الى الحمام والرد عالتليفون ها بقى؟ بيشتغلوا امتى؟ يعنى اروح امتى الاقيهم متفرغين ليا؟

من حوالى اسبوعين تلاتو كدهون كنت ماشية فى سيدى جابر و طبعا فى انتشار رهيب اليومين دول للعربيات الكارو دى اللى هى بتبقى عربية بحمار عشان الناس اللى جيّة من تركيا بس مبتفهمش المصطلحات دى المهم لقيت مكتوب عالعربية ايه من ورا؟ “الباشا خالد و الدلوعة “حمو” بجد انا اتفاجئت انا كنت شوية و هجرى وراه عشان افهم ايه اللى مكتوب وياريتنى ما عرفت يعنى منين حمو و منين امورة؟ و انا اللى قال ايه كنت بألس عالناس اللى بتكتب اسماء و مقولات عالعربية .. خلاص يا جدعان اللى عايز يكتب اى زيطة عالعربية يكتبها انا مش هتكلم فى الموضوع دة تانى

أحد اصدقائى بقى شافتلك ايه مكتوب على عربية اللى بتبقى صغيرة دى اللى ولا منها توك توك ولا منها ميكروباص بتبقى بين البينين بتبقى فى الاوف سايد كدة كان مكتوب عليها “متزعليش يا قطة بكرة تبقى تويوتا ” شايفين المشاعر و التناغم بين السواق و العربية شايف اد ايه خايف على مشاعرها ياااااه فين أيام الحب الجميل ..

صورة

عندك بقى مخبرين تويتر دول من اكتر الناس المثيرين للدجل فعلا يعنى بتلاقى تويتر كله عارف انه مخبر الا هو و تجربتى معاهم تجربة كوميدية هو معظم الوقت بيبقى الافاتار بتاعه بيضه بس المضحك بقى بيبقى اسمه يعنى مرة واحد اسمه “ام ساسو” دة الهاندل بتاعه و عملى منشن عجيب كدة و يقولك انتو هتحرقو البلد و احنا رايحين على فين و دهون ففتحت البروفايل بتاعه بقيت النيم “محمد السيد” يعنى البعيد غبى و خد من دة كتير بقى

عندك برضو على تويتر الشخص العجيب اللى جااى مفكر نفسه داخل شاتينج روم و يقعد يقول هاى يا جماعة ممكن نتعرف .. و ييجى يقولك “ممكن ايميلك” يعنىبيبقى الايموشن بتاع *ايه دة؟ هو انت ابن عمى اللى كان ضايع من 15 سنة؟ وحشتنى آساحبى خد ايميلى اهو يا اهبل* عالم عجيبة

بالنسبة لاعلانات مسلسلات رمضان اللى بتكون دايما حصرى و سبحان الله بتبقى على كل القنوات الباقية حصرى برضو اموت واعرف بقى لو مش حصرى هيبقى الموقف عامل ازاى؟ هيعملوا خدمة توصيل الممثلين حتى باب المنزل؟

تعالوا ندخل فى الاغانى و برامج التلفزيون

عندك مثلا عالم سمسم .. أنا اتفاجئت  لما عرفت ان مفيش حد من الشخصيات اسمه سمسم يعنى اللى سمى البرنامج فشل فشل ذريع الحقيقة و بعدين نمنم مثلا ملوش اى علاقة باسمه يعن نمنم دى المفروض يكون حاجة صغنطوطة كدة و منمنمة لكن دة ماشاء الله أطول منى و لسة فى اولى ابتدائى

الاغانى بقى يا باش مثلا زى اغنية مصطفى قمر اللى بتقول “ايام و سنين بتفوت و انت جوا منى” يعنى مش فاهمة هو كان حامل فى الفترة دى؟ جوا منه ازاى يعنى؟ ما ينقوا كلمات حلوة شوية و معبرة

عندك اغنية دايما الطلبة بيغنوها لما مدرس يقولوهم صباح الخير يقولو له “صباح النور عالبنور لما يزقزق العصفور” بنور ايه و عصفور ايه؟ يعنى اللى كتب الاغنية ملقاش غير كلمة “بنور” يعنى ايه بنور طيب؟

الاغنية بقى اللى اثارت و لا تزال تثير دجل مصر كلها اغنية العيد اللى بتقول “سعد نبيهة بيخليها ذكرى جميلة لبعد العيد” و طبعا الناس كلها كانت فاكرة ان سعد نبيهة دة زى بابا نويل كدة و بيجيب هدايا فى العيد أو ان سعد نبيهة دة احد رجال المخابرات او امن الدولة و بيبقى ليهم هويات سرية

لازم كل مرة بنجيب سيرة المواصلات و التوبيسات و الحلقة دى مش هتخلى من الموضوع دة لان الحاجات المثيرة للدجل فى الاوتوبيسات لا تنتهى دايما لما اركب الاوتوبيسات الاقى ارقام موبيلات مكتوبة عالجلد بتاع الكراسى و مكتوب جنبها اسامى زى “ميزو الحبيب” “خالد اللول” “حمو الباب” الباب دة اللى هو الشخص الجامد يعنى و هو بقى بيبقى مستنى حد يتصل بيه يعنى؟ ولا دة لطوارئ و لا ايه؟ و تلاقيه بقى كاتب اسماء على الكراسى و قصة حبهه المتدمرة و حياته البائسة و اسم حبيبته اللى قالباه و تلاقيه عامل ديكورات  احب اقول له “اراك تكتب فى اوتوبيس امك”

بس كفاية كدة انهاردة أنا قربت افلس و ميبقاش عندى حاجة اكتبها

يلا اراكم الحلقة القادمة يا صحابى #عالم_سمسم_استايل .. القفلة المعروفة بتاعت كل حلقة :))

عايز الحلقات التانية؟ اتكى هنا و حياة الحاجة

مش عايز الحلقات التانية؟ متتكاش هنا و حياة الحاج

برضو مصمم و مش عايزها؟ براحتك على فكرة مش هتندم لو مقريتهاش

لصفحتنا على فيسبوك اتكى هنا عشان خاطر الوالد

2 thoughts on “ظواهر “مصرية” مثيرة “للدجل” الحلقة السابعة

  1. areeg adel قال:

    7lwa gdn ya mai w ana 7tab3 m3aky 7ta al 7l2h al 1000

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s