طب والدستور والانتخابات؟ …. ايه؟


فى بداية الحديث كدة احب اقولكم بس ان ده كلام فى السياسة و كلام باللغة العامية

تحذير تانى برضو انى شخص رغاى اوى و معظمكم عارفين دة بس فى حاجة تانية متعرفوهاش ان انا بتشتت بسهولة جدا يعنى ممكن اكون بتكلم فى موضوع واخرج منه واتكلم فى موضوع تانى ملهوش اى علاقة بالاولانى لمجرد ان اى حد قال كلمة تانية او ان دماغى فكرت فى موضوع تانى ليه بقول كدة؟ محدش يسألنى بس عمةً لو شوفتوا كلام عجيب محدش يستغرب بس نبدأ بقى فى المهم

داخلين احنا ان شاء الله على انتخابات و دستور و ثانوية عامة و امتحانات كليات و حاجة اخر جمال سيبك انت من الامتحانات مش جايبة همها اصلا خلينا فى الانتخابات اللى على كف عفريت و الدستور اللى على كف جنى طبعا انهاردة الثلاثاء 12 يونية 2012

كمان يومين بالظبط كل شئ هيبان عندك قضية عدم دستورية البرلمان و دة هيؤدى لوقف الدستور لو اتحكم بعدم دستوريته و الله انا شخصيا مش فاهم معنى الكلام اللى بكتبه هو احنا ماشيين بانهى دستور بالظبط؟ حاجة عجيبة جدا يعنى احنا اصلا لسة معملناش دستور!

و عندك بقى قانون العزل اللى هيخلينا نعيد الانتخابات لو اتحكم بعدم دستوريته برضو المهم يعنى كلام كتير بس خلينا دلوقتى فى اللحظة الراهنة ان ان شاء الله فى انتخابات و فيه دستور و نبدأ بمشكلة الانتخابات اللى هى بالنسبة لى المقاطعة معلش يا سيدى بس انك تقاطع معناه انك بتقول لشخص تانى اختار لى انت انا مش فارقة معايا بتسيب الفرصة لحد تانى انه يحدد لك مصيرك طب و ليه؟ هتستفيد ايه؟

هتقاطع و تيجى بعد ما الانتخابات تخلص و يحصل حاجة انت مش عايزها تقول انا مشاركتش يا سلام؟ هو احنا فاضيين بقى للكلام دة؟ نقعد نأنب فى بعض و نعاير فى بعض؟ دة اسمه تهريج يا فندم ايوة انا مقتنعة تماما ان احنا ماشيين من اول يوم مسك فيه الطنطاوى فى طريق غلط بس نحاول نصححه مش نفضل مكملين غلط و التصحيح دة مش هييجى بمقاطعتك عشان مفيش حد فى ضهرك هما اللى بيقاطعو كلهم ميجوش 5 الاف اصلا و ميغركش كمية الناس اللى مشاركتش فى الانتخابات الناس دى عندها مشاغل تانية منعتها و بعدين كلام المقاطعة دة كنت تقوله للمرشحين هما اللى كانوا هيبقو كارت ضغط عالمجلس لكن هما نزلوا ووافقوا يشاركو و لما جت الرياح بما لا تشتهى السفن قالك لا دى انتخابات اعععع و ياااى يعنى عيب على شنباتهم بجد و على فكرة مرسى مش حد وحش و لا الاخوان و المعروف ان السياسة لعبة مصالح يعنى الاخوان لما دخلوا السياسة دخلوا ليه؟ ما هو عشان يمسكوا الحكم مش داخلين عشان سواد عيون حضرتك يا فندم و الاسلام السياسى معاهم فوق 50% من كراسى البرلمان يبقى من حقه ياخد نسبة اعلى منك فى تأسيسية الدستور عارف ليه؟ عشان هو شاطر و هو عرف ياخد اصوات الناس و انت معلافتش زى الاول عالمدرسة مش بياخد جايزة؟  بييجى بقى اللى مش اوائل و يقولوا عايزين جوايز؟ لا مش من حقهم و يكون فى علمك ان لو اى تيار كان معاه نسبة زى دى كان هيتصرف نفس تصرف الاخوان عارفين زى ايه زى الواحد اللى معاه كيكة فجه يقسمها فطلعت حتة اكبر من حتة فهو خد لنفسه الحته الاكبر و ادى الحتة الاصغر لزميله فزميله قاله اشمعنى انت تاخد الحتة الاكبر فقاله انت لو كنت مكانى كنت عملت ايه؟ فقاله كنت هاخد الحته الاصغر و اديك الحتة الاكبر قاله طب ما خلاص ما انا حلتهالك و اديتك الحتة الاصغر من الاول اهو هو دة نفس الموقف عايزين يخلوا الاخوان ياخدوا نسبة اقل منهم او ادهم طبعا انا بتكلم عن كل الاحزاب التانية ونخبتنا اللى ما شاء الله عمالين يطنططوا بيه! هو فى ايه يا جدعان هو مولد سيدى المصرى هنا؟ دة كل ما يتفقوا على حاجة يطلع كام واحد يجعجعوا احنا بقى لو هنقعد ندادى كل واحد يبقى مش هنخلص و بعدين نخبتنا دى اللى بتطلع تتكلم كل شوية  كنتو فين لما كان فى ناس بتموت فى محمد محمود و القصر العينى؟ ها؟ كنتوا فين؟ مكنتوش عارفين تاخدو قرارات و لا توقفو المهزلة اللى بتحصل لكن اول ما الموضوع ييجى على مصلحتك لا ميحكمشى و تبدا تعمل طعون و ترفع قضايا؟ صح؟ مش هو دة منهج الاحزاب و النخبة؟ و لا انا بفتكس كلام مش صحيح؟ عشان تعرفوا انهم لما بيبقوا عايزين يحلوا و يربطو بيهيجوا الناس و بيتصرفوا لكن مين بقى كل واحد عايز ياخد حتة من مصر و مس همه الناس و لا البلد اللى متمرمطة معانا دى و تحضرنى فى هذه اللحظة اغنية فيروز كراوية “اخر مرة” لما بتقول

“اخر مرة اعيشهالك ما بين حرصى و اهمالك و علمانية انانية و دقن تفتش النية فى اعمالك اخر مرة هلم شباب بيتظاهر و ساسة لعبهم ظاهر يحضروا كل عفاريتك يجهزوا زان توابيتك لعمالك”

“و اهش النخبة عن صحنك و افض وليمة على لحمك”

كلمات بتصف كل شئ اقولكم اسمعوها احسن

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s