ظواهر “رمضانية” مثيرة “للدجل” *ظواهر “مصرية” مثيرة “للدجل” الحلقة الثامنة*


الحلقة دى حلقة اخرى من ظواهر مصرية مثيرة للدجل و لكنها ليست اى حلقة بالعكس ابسولتلى دى مختلفة تماما عشان هنتكلم عن رمضان و لنسمى الله و نبدأ

عندك اول حاجة وقت الفطار الواحد من دول يقعد يمسح الطبق مسح تيجى تفهه غلطه يقولك يا عم احنا صايمين طول اليوم و مكلناش لقمة و هو اصلا فى الحقيقة بياكل الوجبات الثلاثة عادى جدا يعنى وقت اذان المغرب بيضرب الفطار المظبوط و بعدين يضرب كوباية شاى يحبس و يقوم نازل على صينية الكنافة ويقعد ربع ساعة كدة مانتخ بيحاول يستوعب اللى حصل و بعدين ينزل يصلى التراويح ويرجع يقولك عايز اتعشى طبعا ست البيت الغلبانة مبتقدرش تقول لأ للوحوش اللى فى البيت و بعدين “المصرى اللى على حق ميقولش للاكل لا ” المهم يتعشوا و يشغلوا التلفزيون و لو حد يعنى مؤمن فى البيت يقرا قرآن المهم الوقت يعدّى وييجى وقت صلاة الفجر طبعا لازم يكون فيه سحور يقوموا نازلين عالسحور ماسحينه برضو على اساس انهم طبعا بكرة هيصوموا طول اليوم وكدة يعنى فرق الاكل بين ؤمضان و الايام العادية ان التلات وجبات بدال ما بتاخدهم على مدار 18 ساعة بتاخدهم على مدار 7 او 8 ساعات بالكتير و يقولك جعانين يا اخى اتلهى هو انتو سبتوا اساسا حاجة تتاكل فى البيت بعد الحرب اللى حصلت دى وخد بقى كل يوم من دة

دة طبعا غير الملايين اللى بتنزل عالقهاوى بعد الفطار عشان تحبس

تانى اكثر ظاهرة مثيرة للدجل بقى هى  “مسلسلات رمضان” بص كدة تحس و انت بتقرا الكلمة انك فى فيلم رعب المهم بقى مسلسلات رمضان دى عاملة بالظبط زى المسلسلات التركى اه و الله اسمع منى بس هما بيشتغلونا و بيطلقوا هليها مسلسلات رمضان للتمويه لكن لو بصيتلها كدة هتلاقيها زى المسلسلات التركى بالظبط يعنى عندك مثلا تمووورة عمل مسلسل و طلع فيه ثورجى وكدة لا ومعاه مين كمان عفاف شعيب بتاعة البيتزا يعنى انا مش هعلق الحقيقة لانى علقت عالموضوع دة اكتر من مرة و لسانى بقى عايز قطعه

طبعا انتو مفهمتوش فين وجه الشبه بين المسلسلات المصرية و التركية فى الجزء اللى فات و دة طبيعى جدا على فكرة اوعى تفتكر ان الغلطة فيك بالعكس ابسولوتلى وجه الشبه يا سيدى فى الممثلين يعنى عندك قائمة من الممثلين والممثلات اللى ليهم اعمال درامية ثابتة كل سنة زى مثلا راقصة البالية الاستاذة الكبيرة فيفى عبده كل سنة لازم مسلسل طبعا و تقريبا كلهم بيحكوا نفس القصة اما الست الجبارة اللى مديّة الكل بالجزمة او الست الغلبانة المنكسرة اللى عايزة تربى عيالها بس الجديد بقى انها مرة طلعت انسة اه والله انت معندكش خلفية ولا ايه؟

 فوانيس رمضان

 فوانيس رمضان مبقاش ليها شكل سبحان الله كل سنة بتنزل بشكل عجيب و اغانى اعجب مبقتش فوانيس خلاص  انا مش هكدب عليكو و اقولكم انى من جيل الفانوس اللى بينور بشمعة و كدة لا انا من الجيل الشباب البيجى بيجى اللى بيروح و ييجى بس دة عمره ما اثّر على اى حاجة فى حياتى #احمد_رزق_فى_لخمة_راس_ستايل

بس او فانوس جبته كان شكله فانوس عادى بس اخر فانوس شفته السنة اللى فاتت بتاع اخويا و على شكل جمل! جمل يا كفرة؟ و بعدين كل سنة ينزل باشكال غريبة جدا يعنى حسن شحاته مثلا ايه علاقته برمضان و الفوانيس بينوّر باليل مثلا؟

و عندك بقى كرومبو و بكار و ابو تريكة و بسنت و دياسطى انا خايفة انزل السنة دى اشوف الفوانيس الاقى هيفاء وهبى بتغنى “بوس الواوا”

عندك بقى الشخص اللى ماشى يشتم و يسب و يتعارك مع الخلق  و صايم فى نفس ذات الوقت ابن اللعيبة و تيجى تكلمه يقولك “اللهم انى صائم”  يا راجل؟ يا واد يا مؤمن

و يا سلام بقى لو تنزل كدة قبل الفطار بساعتين كدة مثلا و اتفرج عالشوارع و الزحمة و اللى الناس بتعمله فى بعض يعنى تلاقى الواحد من دول شكله محترم كدة و مهندم بس ساعة الاكل يسقط منك #اعلان-كوتونيل_ستايل

و يبان بقى على حقيقته و الشراهة الفظيعة اللى عند الاشخاص و ممكن تحس ان الناس اللى ماشية فى الشارع واحد ممكن يمسك دراع اللى جنبه يعضه اه و الله رمضان دة بيطلع اللى جوانا

عندك بقى العزومات اللى مبتخلصش.. فى رمضان تحس الناس مبيعرفوش بعض غير فى رمضان عشان العزومات وبتشوف انواع اكل عمرك ما شفتها بقى و بتشوف ناس برضو بتقعد بالسنة ما بتشوفهمش و مبيظهروش غير فى رمضان

 طبعا اكتر شئ مميز فى رمضان البمب و المفرقعات تفتكروا ايه السبب ورا الموضوع دة؟ افتقادنا كمصريين للحروب و كدة؟ ولا حبنا للدوشة عشان نكسر الصمت الرهيب وقت الفطار؟ يعنى اول ما المغرب يأذن متسمعش صوت فى المنطقة كلها غير صوت المعالق و الاطباق و صوت عيل رخم بيفرقع بمب بس كدة مفيش كلب حتى معدّى فى الشارع

و كله كوم ياخى و اللى بيحصل فى صلاة التراويح كوم تانى

صلاة التراويح بقى يا سيدي صلاة جميلة جدا و يا سلام عل روح اللي بتحسها فالمسجد بس في بقى ناس لازم تعكر صفو الصلاة و تستفزك و تطلع عفريتك إنت و غيرك كتير واللي أنا هحكيه دة حاجات غريبة من وجهة نظري و بتحصل في مصلى السيدات أول حاجة بتلاحظها لما بتدخل و بتقف تصلي و بيكون الإمام تقريباً خلاص  بيخلص صلاة العشاء و تلاقي في ناس لسة بتدخل و تلاقيهم بيلعبو دور لاعب الجمباز و بيعملو كل الحركات البهلوانية الممكنة عشان يدخلو يدورو على مكان يصلو فيه عشان طبعا الدنيا زحمة و يفضلو يتنقلو بين الصفوف و يا سلام لو لقوا خرم إبرة على رأي إسم المسلسل بتاع عمرو سعد بيروحوا قافزين فيه و فى اللحظة دى بس بتعرف السبب ورا ان ليه فى الصلاة اللى واقف جنبك بيبقى مصمم يقف فوق رجلك وتقوله رجلك لو سمحت يقولك لا لازم تبقى رجلينا لازقة فى بعض عشان الشيطان ميقفش بيننا.. على فكرة بقى الشيطان بيبقى محبوس فى رمضان بس هما بيعملوا كدة عشان الشخص البهلوان دة ميجيش بزنق نفسه فى المكان الصغير جدا دة الذى لا يسع لبيبى اصلا انه يقف فيه

عندك بقى كمان شخصين بيبقوا اكثر الاشخاص استفزازا بيلعبوا دور الواعظ الدينى و يقعدوا يلفوا فى المسجد و يعدلوا وقفة الناس و لازم تبقى واقف بزاوية معينة على خط معين بشكل معين و غير كدة تبقى جىّ عشان تخرب عليهم الصلاة و طبعا دول بيبقوا تقريبا جايين عشان يبقوا امن المسجد لان بيضيع عليهم الصلاة من كتر التنطيط

الشخص التانى بقى اللى بيقعد يزعق فى الاطفال الصغيرة و امهاتهم و دايما بتبقى ست كبيرة و تقعد تزعق بطريقة غريبة جدا و تكفر العيال و اهاليها انا معاكوا ان العيال بتفضل تجرى وبتشتت اللى بيصلى بس يعنى بالراحة مش كدة يا حاجّة اصل كدة العيال هتعمل عقلها بعقلك و هيزودوا العند و انتى ست كبيرة تقعى مننا ولا حاجة.

كان فى بنت شفتها بقى ماسكة شوية عيال بتقولهم بصوا يا ولاد انا و انا صغيرة كنت بقعد العب زيكوا كدة و اعمل دوشة بس انا دلوقتى عرفت ان دة غلط فمبقيتش بلعب و بدخل اصلى البت اصلا ماسكة شوية عشال اكبر واحد فيهم عنده 5 سنين و هى عندها بتاع 16- 17 سنة و بتقولهم انا دلوقتى فهمت؟ يعنى انتى بقيتى اد امى و كمان مش عايزة تعرفى؟ هاار اسود.

 

عندك بقى بعض الاشخاص الاخرين المستفزين بس مش زى الاتنين التانيين دول عندك اللى بيقعدوا فى تجمعات ويتكلموا و لو سمعوا صوت حواليهم يقولك وطوا صوتكو عشان نسمع الخطبة! يا واد يا مؤمن .. عندك بقى الناس اللى بيكبروا ويبدأو الصلاة بعد ما يكون الامام خلص الفاتحة و دخل فى السورة اللى بعدها و فى كل ركعة تقريبا يعنى مبيرحموش يقعدوا يتكلمو,يتفكروا,يريّحوا شوية, يشوفوا رجلك فين عشان لو واقفة غلط يعدلوهالك و اول ما يلاقوا الامام قرب يخلص يقومو داخلين فى الصلاة ..

احلى حاجة بقى كمان ان الناس اول ما بيخلصوا اول اربع ركعات فى التراويح بيبقى خلاص وقت الخطبة فكلّه بيجرى بسرعة عشان يلحق مكان حنب الحيطة عشان يسند ضهره عليه بس الحلو بقى ان الامام  يخيّب املهم كلهم و يقرر انه ميخطبش اليوم دة و يروح قايل “استقيموا” يا عينى مبيلحقوش يتهنوا بالقعدة

فى نوع بقى من الناس و دى بتبقى السيدة اللى جايّة تخطب لابنها و بما ان فى واحدة جايّة تخطب لابنها ففى واحدة تانية جايّة عشان تتخطب بس مندخلش يعنى فى نيّات الناس و كدة هما اكيد جايين يصلوا بس جايين لاغراض تانية فى نفس الوقت و تلاقى الواحدة من دول تقعد جنبك و تبدأ تسأل اسئلة عجيبة زى مثلا “انتى من هنا يا حبيبتى؟” لا يا  طنط انا جايّة بالاسدال و الشبشب من القاهرة ما اكيد من هنا يعنى! “بتدرسى ايه؟” “ساكنة فين؟” بتبقى عايز تقولها ارجوكى متاكلينيش متخطفينيش متقتلينيش #حزلئوم_ستايل

حاجة غريبة شفتها انهاردة بقى هو من الطبيعى طبعا ان لما الامام يبدأ يدعى و كدة و ييجى عند الجزء بتاع الذنوب و الخطايا و ما شابه فى ناس بتتأثر و تعيّط و كدة و انا شخصيا ببقى متأثرة طول الدعاء مش فى الجزء دة خصوصا بس مش بعيط يعنى انا بحس احساس غريب و اد ايه احنا محتاجين ربنا و مع ذلك مش بنعمل اللى علينا ! بس الغريب اللى شوفته بقى انهاردة بنت عندها 12-14 سنة و البنت اول ما جه عند الجزء بتاع الذنوب دة و بيقول “اللهم اغفر ذنوبنا و استرنا ولا تفضحنا امام خلقك” و الناس بدأت تبكى البنت بدأت تبكى بطريقة غريبة و انا كنت وقفة جنبها  :Oعايزة اقولها ايه يا بنتى الله يخرب بيتك انتى لحقتى عملتى كل الذنوب دى امتى؟ فاجئتنى بصراحة فمش عارفة هل انا اللى معنديش دم و لا احساس و لا هى اللى كانت بتأفور!

كمان عندك بقى التخفيضات اللى بتنزل فى رمضان عشان حاجات العيد و بعض حاجات رمضان بتوصل ل 70% تدخل المحل من هنا و تقعد تلف حوالين نفسك انك تلاقى التخفيض دة مفيش مثلا اللبس تلاقى التخفيضات عالتفاهات و الهدوم الداخلية او انك تلاقيه بيقولك خد واحد و تاخد واحد هدية تلاقى مثلا بوكسر عشان دى من اكتر اللصناعات مبيعا فى العالم على فكرة تلاقى مثلا الواحد ب 300 جنيه عشان تاخد واحد و عليه واحد هدية

ايه دة ما شاء الله وصلنا للعيد الحمدلله؟ طب كويس و الله دة احنا بننجز اهو طبعا اكيد كلكو عرفتوا دلوقتى ان الموضوع خلص نقطة و من اول السطر

* اللى انا كتبته دة لا يقلل من رمضان كشهرعظيم مقدس و لا يقلل من قدر صلاة التراويح و الروح الجميلة اللى فيها و الناس اللى عرضتهم دول ليسوا الاغلبية طبعا بس دى بعض النماذج المستفزة الموجودة فى كل حتة عادى جدا

 بس و شكرا

* اه ملحوظة كمان ان  بعض الاجزاء فى هذه التدوينة تمت بمساعدة الباش مدوّن أحمد الدلق و لو اتكيت على اسمه هيطلعلك التويتر اكاونت بتعه لو حابب تعمل فولو لو مش حابب تعمل فولو دى حاجة ترجعلك و ممكن تقرا مدونته اسمها “بشرفك” و لو اتكيت عليها هتوديك على لينك المدونة و شكرا مرة تانية

باقى حلقات ظواهر مصرية مثيرة للدجل اتكا هنا

5 thoughts on “ظواهر “رمضانية” مثيرة “للدجل” *ظواهر “مصرية” مثيرة “للدجل” الحلقة الثامنة*

  1. رهييييييييييييييييييييبه دي :D برافو انتي والباش مدون احمد

  2. shadizm قال:

    جميلة جدا يا مي .. وواقعيه :)

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s