البنى ادمين بيشجعوا بس احنا مش معاهم

طبعا مش معنى ان التدوينة اسمها “البنى امين بيشجعوا” يبقى احنا مش بنى ادمين بس المقصود هنا ان البنى ادمين دول كتير اوى بس من اللى بشوفه طول الوقت من بنى ادمين بيبقى نقول مثلا 70% منهم مش اشخاص يثق فيها و مش اشخاص كويسة بالمرة و ال 30% الباقيين ناس كويسة فيهم عيوب اه بس كويسين طبعا دى كلها ارقام اى كلام عمًة بس اللى عايزة اتكلم فيه اكتر من صفات بشوفها فى الاشخاص و بتضايقنى ان كانت بقى بتحصل فى مواقف معايا شخصيا او من طريقة تعامل الناس مع بعض و حبيت اكتب عنها بس عشان اطلّع غضب كان جوايا و مش بس كدة عشان كل حد يشوف ايه اللى بيعمله فى الحاجات دى ويحاول يغيرها و انا اولكم و لما اكتبهم كدة هيثبتوا فى دماغى و على اد ما اقدر احاول ابعد عن التصرفات دى و عن طريقة التفكير دى اللى بتخليك مش شخص كويس لا ادام نفسك ولا ادام ربنا ولا ادام الناس و رغم انى عارفة ان ممكن محدش يقرا دى بس هى فى الاول و فى الاخر انا كتبتها عشانى قبل اى حد التصرفات اللى بتضايقنى دى بتكون مرتبطة دايما بانواع معينة من الاشخاص يعنى مثلا عندك الشخص اللى تبقى صاحبه و حبيبه و كفاءة بس ظاهريا بس يعنى يوم ما تقع فى زنقة مش هتلاقيه مش عشان حاجة بس عشان هو طالما لقى فرصة تخليه احسن منك ليه ما يستغلهاش؟ يعنى هو يقدر يساعدك و كل حاجة بس لو مساعدكش ممكن دة يتيح له فرصة انه يتفوق عليك خصوصا لو بتشتغلوا فى نفس المجال مثلا انت مش بتطلب منه ييجى على مصلحته عشانك بس برضو مش هتاخد منه حاجة ..

طبعا بقى ناهيك عن الاشخاص المنفوخين .. المنفوخين دول اللى هما بيكونوا اشخاص طبيعين بس ربنا بيكرمهم و بينعم عليهم و ا نت كنت تقعد تدعيلهم ربنا يكرمهم فهما بيقابلوا نعمة و كرم ربنا عليهم و يتنفخوا و اول حد يتنفخوا عليه بيكون انت ,حاجة تقطع القلب

عندك بقى المنظرين و والواعظين اللى بيقعدوا يدّوك نصايح و هما اصلا عايزين اللى يوعظهم والله يعنى بتلاقيهم دارسين كل انواع المحاضرات عن كل انواع المواضيع عشان يطلعوك غلطان وهما اصلا نفوسهم وحشة بس انت مبتعرفش تتكلم عشان الموضوع اكبر من الشرح

وطبعا دة غير الناس اللى بتقعد تتكلم عن الله و الرسول و مش عارفين ان ممارساتك اليومية و تعاملك مع الناس اللى حواليك ثوابهم و جزاءهم اكبر من انك تقعد تعمل نفسك متدين وتعرف ربنا شةف نفسك الاول و صححها وبعدين ابقى اتكلم عن ربنا و اوعظ الناس عشان ربنا قال “ان الله فى عون العبد ما كان العبد فى عون اخيه” و الرسول قال “حب لاخيك كما تحب لنفسك” و ربنا قال “ان الله لا يحب كل مختال فخور” لما تبقى تحل المشاكل دى جزاك و غيرها كتير ابقى اوعظ الناس و تنصحهم عشان لما تنصح حد وتنظّر عليه وانت اصلا عندك مشاكل فى شخصيتك ممكن تخليه يتحول لشخص اسوأ و فى ناس هتلاقيها ببتحول لاشخاص اسوأ عشان شايفين انهم مش هيقدروا يتعاملوا مع اللى حواليهم غير بنفس طريقتهم بس صديقة قالتهالى “خليكى انتى الاحسن” خليك انت الاحسن عشان لو غيرت من نفسك عشانهم تبقى غلطان لانك مش مستنى منهم حاجة انت بتعمل كدة عشان شكلك ادام ربنا وادام ضميرك و ضميرك بيبقى مرتاح لما تلاقى نفسك بتقولك “بص انت بتتعامل معاهم ازاى و هما بيتعاملا معاك ازاى؟” هنا نفسك متضايقة اوى انك الناس بتعاملك بطريقة مش ولا بد وانك بتساعدهم و تتعب عشانهم و هما مش بيستحقوا و انك بتعاملهم بطريقة كويسة و هما مش بيردولك دة بس هى بتبعتلك رسالة ان ضميرك مرتاح لما تقولك “بص انت بتعمل ايه وهما بيعملوا ايه” بس الغلط انك عشان تريّحها تتعب ضميرك عشان طول ما ضميرك تعبان هتلاقى نفسك كاره نفسك حتى لو مش حاسس و بتحاول تعوّض دة فى اى حاجة تانية فى انك تتكبر عالناس و تحاول تخلى صورتك حلوة بس افتكر ان كل دى حاجات ظاهرية ادام الناس و افتكر ان الاساس ربنا و هو دة اللى انت عايز يبقى شكلك حلو ادامه و طول ما شكلك حلو ادامه وادام ضميرك هتلاقى الناس حتى المش كويسين منهم عارفين انك كويس و هيحاولوا يغيروك! مفيش بنى ادم معندهوش مشاكل بس فى ناس عندهم مشاكل كتير فعلا و دى بتكون نتيجة تربية او نتيجة احتكاكهم بناس خليتهم كدة بس نفسى كل واحد فينا و اولهم انا نحسن من نفسنا و بص للصورة من برة عشان كل ما تقرّب عالصورة و منخيرك تلزق فيها الصورة مبتبقاش واضحة لكن كل ما تبعد بتشوف ابعادها و تشوف تفاصيلها و تعرف شكلها الحقيقى وفى الاخر ايه و عشان كدة لا انا اقدر احكم على نفسى ولا اى حد بيقدر  يحكم على نفسه صح و لا حتى اللى حواليك هيقولولك هما شايفينك ازاى عشان محدش عايز يزعلك بس كل واحد برضو بيبقى عارف اذا كان اللى هو بيعمله دة صح ولا غلط حتى لو كان بيبرر لنفسه تصرفاته و بيشوف نفسه حد جميل و حد لطيف و لذوذ بس برضو بيبقى عارف انه غلط  وعارفة ان الكلام اللى قلته دة كل حد هياخده بطريقة مختلفة وعارفة ان المفروض الكلام دة اسيبه لناس تانية اكبر منى و اتعاملت مع ناس اكتر منى بس الكتابة بقت هى الطريقة اللى بعبر فيها عن نفسى سواء كنت متضايقة او مبسوطة و كان فى ككلام كتير كنت عايزة اقوله بس نسيته بسبب النور اللى قطع غير واحدة الله يجازيها خير سهّتنى انقذتكوا منى الحقيقة

بس و شكرا