الوجه الأخر للمحروسة


و تبدأ القصة فى اليوم السابع من يناير 2013 حيث الجو بارد و نحن نشاهد قناة النهار على برنامج اخر النهار و فى احد التقارير الكثير سأل الصحفى احد المارة و هو احد العمال عن كيف يرى احوال البلد و الراجل قال له ” دى لا بلدنا ولا لينا حاجة فيها احنا بنجيب اليومية بالعافية”
وقتها حسيت بالدموع فى عينى مش عشان هو مش حاسس بان البلد مش بلده بس و لكن على حاله و حال الكثيرين .. احنا بنتكلم عن بلد نصها تحت خط الفقر و نصها تانى واقف عالخط و المشكلة ان اشباهى من  ابناء الطبقة المتوسطة التى تعتبر مرفهة جدا بالنسبة لباقى البلد مش شايفين باقى المجتمع او شايفين و عاملين نفسهم نظرهم ضعيف اما ابناء الطبقة الاعلى قليلا  شايفين نفسهم كل المجتمع يعنى انا احد صديقاتى كان عندها مقابلة و سألها طالب IG بيقولها انتى شايفة ايه مشكلة التعليم فى مصر قالتله “مشكلة منهج و مشكلة نظام و مشكلة مدرسين” قالها “لا متقوليش مشكلة منهج لان فى 50,000 طالب IG فى مصر” احب اوجه لهذا الشخص رسالة و اقوله “اهلا بك فى بلد ال 90 مليون نسمة يا فندم” ال 50 الف اللى بيتكلم فيها دول عبارة عن يكونوا ايه جنب ال 90 مليون؟ ال 90 مليون دول اما بيتعلموا تعليم حكومة عادى و اما مبيتعلموش خالص و هو قاعد بيعوم فى ميّة الزبادى و يا ريت على كدة و بس انت لما بتيجى تبص بقى للناس اللى فى التعليم الحكومى بتلاقى برضو كل واحد على اد فلوسه يعنى انا واحد مبسوط من ابناء الطبقى المتوسطة بقدر ادخل ابنى مدرسة كويسة و اديله دروس عشان يخلص ثانوية عامة و يدخل طب او هندسة او اى من كليات القمة وواحد تانى اقل حظا من ابناء الطبقى المتوسطة برضو مبيقدرش يعمل كل دة فابنه بيضطر يعتد عالمدرسة اللى مش موجودة فبرضو بيكون حظه فى التنسيق اقل من اقرانه وهو وحظه بقى مع انه ممكن يكون احسن من غير بس الامكانيات مكانتش متاحة و اهو من غير لا رشوة و لا محسوبية ادّى المساواة فى بلدى

نرجع لقصة العامل .. الناس اللى بتبقى شغالة عمال زى كدة بتفضل طول اليوم تشيل و تحط و تطلع و تنزل عشان تبنيلك البيت اللى انت قاعد فيه بيطلع فى اخر اليوم ب 20 جنيه يعنى لو افترضنا ان الراجل دة بينزل يشتغل كل يوم و بيلاقى شغل يبقى بيطلع فى الشهر بعد كل المرمطة دى ب 600 جنيه و غالبا كمان بيكون ساكن فى اماكن خارج المحافظة فبيضيع نصهم عالمواصلات و الكلام دة لو هو بيشتغل كل يوم يعنى ممكن يتعب يوم ميقدرش ينزل و ممكن تحصل له اى اصابة من الحاجات اللى بيشيلها و البهدلة و ايام البرد زى دلوقتى مبيبقاش فى شغل يعنى من الاخر الناس دى مش عايشة وبعدين تبص تلاقى ناس تانية اسوأ حالا عايشة فى عشش و ناس عايشة فى الشارع و ناس مش لاقية تاكل واطفال بيتبهدلوا و بيتم استعبادهم و مجرمين و حشاشين ماليين الشوارع و مفيش امن ولا امان و فى الاخر تلاقى الساياسيين بتوعنا بقى يطلعوا يبهرونا بذكائهم المعتاد يتناقشوا فى اهم القضايا اللتى تهم الوطن زى مثلا الخمرة عشان احنا شعب خمورجى ابن هوباااا بطبعه ولا ايه؟!

يطلع الاسلاميين من ناحية يقولك “احنا هنمنع الخمرة”

تطلع المعارضة “الخمرة دى حرية شخصية”

يطلع الاسلاميين تانى “احنا هنرفع الضرائب على الخمرة”

المعارضة تانى “السياحة من اهم موارد الدخل القومى و لو منعناها السياحة هتنضرب”

فعلا كلامهم مهم بخ انا مش عارفة ازاى الشعب هيعيش ازاى من غير خمرة؟ دة حتى كدة الشعب ممكن يدمن الكحول بس يعنى اللى مش لاقى خمرة يشرب تيكيلا!

و بعدين عدم اللامؤاخذة الفلوس اللى تيجى من حرام مش عايزينها ما احنا قعدنا عشرات السنين سايبين الخمرة و مبنرفعش ضرايبها ولا حاجة و منا على نفس الحال و موحولين و متنيلين بنيلة ايه الجديد؟ خلاص هى الخمرة بقى هى اللى كانت مبوظة البلد او كانت هى اللى من غيرها البلد هتقع؟ خلينا عمليين و واقعيين و كفاية سخافة الساسة و النخبة

كان فى اوقات موقفى فيها بيبقى ابيض او اسود بس حاليا مبقتش عارفة انا مع مين عشان الفرقتين بيضحكونى فعلى حسب الموقف يعنى من الاخر بشجع اللعبة الحلوة

الناس كانت زمان بتكره العدو اللى بييجى ارضها و تثور عليه عشان كان بيقتل عيالها و ينهب قوتها و يسرق ارضها و يهتك عرضها فلما يبقى الناس بيحصل فيها كدة من غير احتلال و لا عدو يبقى فين الدولة و فين المواطن؟ احنا كلنا مش بس مصر و الوطن العربى كله واقعين فى المجارى و لو مش هنموت غرقانين فى القرف هنموت من الريحة و اسفة عالتشبيها المقرفة بس هو دة وضعنا فعلا :| ادعوا لنا و ادعوا لكل ابناء الوطن العربى لان الشعب هو الضحية فى فى وطنى العربى

عايز تشوف مصر؟ هى دى مصر

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s