جمل مصرية مثيرة للدجل


الحلقة دى مخصصة فقط للجمل العجيبة اللى ممكن تقابلها فى حياتك اليومية

زى مثلا انك تكون فى اتوبيس نقل عام و تدفع للكمسرى فيسألك سؤال “واحد؟” لا والله ادينى اربعة خمسة كدهون للزمن .. اكيد واحد يا كابتن يعنى وانا لو عايز اكتر من واحد هقولك و هصارحك والله

زى انك مثلا تكون قاعد عالكمبيوتر فى امان الله تيجى الوالدة تقولك “هو انت تنام وتقوم عشان تقعد عالمخروب دة؟” طب ما انتى كمان بتنامى و تقومى عشان تهزّأينى على قعدتى عالمخروب يعنى ما اختلفناش كتير عادى

لما تسمع واحد بيبيع حاجة فى الشارع و عمال ينادى عليها بعيدا عن الاشعار اللى بيكون عمّال يقولها فى وصف هذه السلعة الرائعة زى “حمار و حلاوة يا بطيخ”  “يا ابو قلب ابيض يا بتنجان” “قشطة يا جوافة” بتدّيك ايحاء انه بيعاكس الفاكهة او الخضار مش بيبيع بس اللى يبهرك بقى انك تسمعه بيقول ” بخمسة يا موز وخد الاتنين بعشرة يا بيه” طب احلف كدة؟ ايه العرض الجبار دة؟ عرض الاتنين كيلو بسعر اتنين كيلو عادى جدا

كان فى زمان وانا صغيرة لعبة رهيبة كدة كانت بتقول ” طق طق طق مين عالباب؟ انا الوزير الكبير الكبير .. عاوز ايه؟ علبة الوان لونها ايه؟ احمر”

و هنا تكمن المشكلة يعنى وزير جاى يخبّط على باب البيت و احنا بنسأله عاوز ايه فبيقول علبة الوان , يا اخى دة ايه الوزير الفرفور التوتو دة؟ و بعدين مين كان قاله اننا فاتحين محل قرطاسية هنا؟ و غير كل دة المشكلة انه بيختار علبة الوان كلها لون واحد .. معنديش حاجة اقولها اصلا مش عارفة اعبر عن المشاعر المختلطة جوايا لما بفكر فى الالعاب دى و اللى اخترعها

من اكبر المشاكل اللى بقابلها كمواطن هى تلك االلحظة لما حد بيخبّط عالباب و انت تقول مين؟ فيقولك “انا” قول و المصحف؟ عرفتك انا كدة؟ عادى لما يكون حد من العائلة بيخبط ويقول انا لان المفروض انى عارفة صوته لكن لما يكون حد غريب مثلا او من الجيران ويقول انا المفروض اتصرف ازاى فى الموقف دة و فعلا مرة خرجت عن شعورى ورديت عاللى عالباب قلتلها ” انتى؟ انتى مين يعنى” طبعا من ساعتها الست بتبصلى بقرف

فى سؤال كدة بيتسأله اى شخص سافر لاى دولة اخرى يعنى مثلا انت سافرت اوزبكستان فأول ما ترجع بتلاقى بقى بعض الاشخاص الفصيلين من العائلة و الجيران و المعارف بيقولولك “حلوة اوزبكستان؟ بس ايه رأيك؟ مصر ولا اوزبكستان؟” اند يو فيل لايك همممم هو فى زى مصر و لا حلاوة مصر؟ دة انا بخرج منها كأنى سمكة و طلعت من البحر, كأنى أكل و طلع من الثلاجة ياااه مصر دى ام الدنيااااااااااااااااااااااااااااااااااااااااااااااااا”

والسؤال دة مش بتتسأله لما بتخرج برا البلد بس و النبى انت لو رحت طنطا هتلاقيهم بيسألوك نفس السؤال “طنطا ولا اسكندرية؟” و على فكرة انا مش بقول طنطا عشان هى وحشة, طنطا دى قمر قمر قمر بس عشان هى على بعد ساعتين من اسكندرية مش اكتر :D

و طبعا الجملة الشهيرة “اللى بنى مصر كان فى الاصل حلوانى”  انا معنديش حاجة اقولها غير “والنبى كل واحد يخليه فى شغله و بلاش فزلكة عشان هو دة اللى ضيّعنا, حلوانى يبنى بلد و تمرجى يعمل عمليات و مهندس يبيع طرشى و اعمى يسوق عربيات”

قمة التناقض بقى فى الجملتين اللى جايين دول جملة “اقعدوا بالعافية” و “اصل انا بعافية شوية” العافية فى اول جملة معناها الصحة و فى الجملة التانية معناها المرض لييييييييييييييييييييييه؟ دلوقتى الاطفال اللى زيى يقفرقوا بين الكلمتين ازاى؟ و هو خلاص من قلة الكلمات يعنى؟ بتفكرنى بسؤال النحو المقرف لما كان يقولك “لماذا نصبت الكلمة فى الجملة الاولى و رفعت فى الجملة الثانية”

اخر حاجة بقى لو الناس بطلتها هيبقى العالم احسن كتير جملة “أوى بقى” لما تيجى تاخد رأى حد فى حاجة و يقولك  “اوى بقى”  يعنى قصدك تقولى انها حلوة اوى بقى؟ ولا وحشة اوى بقى؟ ولا مش عايزين تجرحوا مشاعرى؟ خليكوا محددين الله يكرم اصلكوا عشان الانفصام اللى عندكم دة متعب جدا

فى فكرة برضو راسخة عند ناس كتير اوى ان الشخص اللى لابس نضّارة دة شخص كفيف يعنى مرة كدة اغلط وانزل من غير نضّارة لو بتلبس نضّارة وشوف حجم الفجيعة و اد ايه ناس هتندهش ويقولولك “انت شايف؟ طب دول كام كدة؟ قول و المصحف انك شايف” يا جماعة انا كشخص بلبس نضارة كوقار بس مش عشان انا عامية ولا حاجة :D

لما تكون فى الشارع و تسأل حد عن الساعة ويقولك “إلا عشرة”  ياااه يا فندم شكرا عالافادة والله طلعت الا عشرة؟ وانا اللى كنت مفكراها الا ربع اما انا طلعت هبلة صحيح .. هى مين دى اللى الا عشرة بالظبط؟ ما الارقام كتير يعنى عندك لحد 24 ساعة منكن تكون اى واحدة فيهم عادى

اخر حاجة انا كنت ماشية من كام يوم كدة فى الشارع و سمعت اغنية بتقول “اوعى تقول لحد عاللى عملته فيّا” انا مش هعلق و هسيب التعليق للقارئ الجميل عشان انا حيائى اتخدش فى الحقيقة هو مش اتخدش دة حصلّه جرح غميق و اللى حصل انهاردة انى كنت بتصل على رقم و كانت نمرة غلط و ذاك الشخص حاططها كول تون انا مش هرد عليه برضو انا كنت بقعد اسمع اهواك بلا امل و اقول  “عيب عليكى يا ست فيروز مش كدة اللى انتى بتقوليه دة عيب وحرام ويتهز له سبع سماوات”

مش هتكلم المرة دى عن الحكم اللى على ضهر التوكتوك هنخليها لمرة لوحدها مدة على رواقة ;)

شكراااااا :D  بحبكوا كلكوا اند يو نوو ايت , ربنا يخليلنا هانى شاكر و نقعد نتمألس عليه علطول كدة نياهاهاهاهاهاهاهاهاهاهاهاهاهاهاها

لو عندك وقت ممكن تقرا الحلقات الاخرى من ظواهر مصرية للدجل من هنا

و لو حابب تشوف مدونات تانية ممكن تشوف دول

مدونة بشرفك

مدونة عشرى

مدونة سوليمانيا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s