بحاول على اد ما اقدر اقلل كلامى فى السياسة عشان مجبش لنفسى كلام بايخ ملهوش لازمة بس بما انى شايفة كلمتين فى الحق من وجهة نظرى هقولهم واريح ضميرى و اللى يقول عليا اخوان او لجنة يبقى هو مريض مش معنى ان حد بيخالفك فى الرأى يبقى اخوان او لجنة و تويتر بقى عبارة عن موقع للقرف مش للتواصل مبشوفش عليه غير شتيمة ابيحة وقلة ادب لمجرد اختلاف وجهات نظر و فى الاخر نتكلم عن ديموقراطية كفاية بقى بنضحك على نفسنا لما نطبقى الديموقراطية دى على نفسنا نبقى نقول احنا بنطالب بالديموقراطية و الاشخاص اللى بيتم اتهامهم انهم مثلا خرفان او ايا كان ممكن يكون فيهم ناس احسن من الشخص اللى بيتهم دة و بيشتم و دماغهم اعلى منه كتير و زى ما بتعيبوا عالاخوان و السلفيين انهم ممكن يكفّروا حد لمجرد اختلاف وجهات نظر و بتقولوا ان ممكن يكون الشخص دة عند ربنا احسن منهم فياريت القاعدة تطبق بالعكس مش اى حاجة ليا تبقى حلوة و لو عليا تبقى وحشة و بنت ستين كلب و ربكم رب عدل و كما قال الله فى كتابه الكريم:
-وَلا يَجْرِمَنَّكُمْ شَنَآنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ-
مش عشان انا بكره اخوان يبقى اى حاجة هما بيعملوها تبقى وحشة ورغم ان ليهم تصرفات مستفزة و كلام ينرفز انا عارفة بس المعارضة برضو عليها كلام ينرفز زى مثلا جورج اسحاق امبارح كان حد مستضيفه و قاعد بيقول ان الحكم على ال 21 شخص بالاعدام دة مش عدل و ازاى كدة و ليه محكموش عالناس اللى قتلت المتظاهرين ووووو ..طب السؤال هنا -انت عايز ايه يا عم جورج؟- يعنى لو مكانش الحكم دة طلع مكانش الاولتراس هيهدى و لا هيرتاح و لا هو ذات نفسه كان هيسكت اصلا و مع ان اصلا الاخوان ملهمش دعوة و لا اى تدخل فى احكام القضاء و لا مرسى و نخلينا واضحين ان القضاء مش بيعشق مرسى و الاخوان و القضاء دة جدير بالذكر انهم كانوا قضاء طاهر من اسبوعين تلاتة لما وقفوا ادام مرسى و عارضوا قراراته و حوارات النائب العام و هو هو نفس القضاء اللى حكم بالبراءة فى قضية سميرة ابراهيم و هو هو نفس القضاء اللى مرجع يعنى من الاخر كدة لا مؤاخذة قضائنا دة شامخ من زمان مش من ساعة ما الاخوان مسكوا يعنى الشموخ دة من صفات قضائنا من ايام ما كانت الثورة ثورة والفلول فلول و شفيق مش معارضة و خيرى رمضان مش ثورجى و لميس الحديدى مش اعلامية جامدة بخ و رولا خرسا كانت بنت كلب و مين تانى اتبدل حاله؟ مش فاكرة و الله اصلهم بقوا كتير اوى مبقتش عارفة مين دول و مين دول خلاص كلة دخل فى بعضه البلد عندها انفصام يا جدعان وربنا و محدش حاسس بخطورة الموقف و بعدين اسقاط مرسى دة مش حوار سهل لانه وراه ناس بتسنده اذا كان الناس دول بقى اخوان و سلفيين و احبابهم و متقعدش تقولى بقى دول ناس جهلة و مش عارف ايه ما هو الناس الجهلة دول مش بيقفوا مع الاخوان كدة يعنى هما بيقفوا مع الاخوان عشان الاخوان ليهم مواقف حلوة معاهم من زمان قبل ما تظهر المعارضة و النخبة بتاعتنا دى بعد الثورة كانوا الاخوان هما اللى بيساعدوا الناس “الجهلة” الغلابة دول تمام؟ لما ييجى حد من الاخوان يقولهم روحوا بكرة و ساعدونا فى الانتخابات الناس مش بتقولها لا عشان هما ليهم مواقف كويسة معاهم و الناس بتبقى عايزة ترد لهم الجميل و برضو الاخوان زى اى حاجة فى البلد فيها فساد و فيها قيادات مريضة هى اللى بتسيطر و بتحكم و انا اعتقد ان اى حد من الناس اللى عمطروحين عالساحة دول مسك البلد هيكون زيهم لو مش اسوأ و فى الاخر الشعب هو الضحية بتاعت القرف دة و القيادات الواطية و الاخوان و الاسلام السياسى ليهم تقل فى الشارع متقدرش تقصيهم مفيش حاجة اسمها الاخوان يسيبوا خالص لو هنقول مثلا الاسلام السياسى له 25% تقل فى الشارع يبقى هياخدهم فى البرلمان و فى الشورى و فى اى انتخابات او استفتاءات هتحصل و اقصائهم مستحيل و لو اسقطت مرسى و جبت واحد غيره هينزلك حبايب مرسى و تفضل البلد كدة بقى سنين عمالين نسقط دة و ينزلنا فى الشارع حبايبه وهكذاااااا الى ما لا نهاية و حتى لو قلنا انتخابات مبكرة برضو الموضوع مش هيمشى بسلاسة عشان هيبقى فى ناس بتنزل الشارع برضو تعترض عالرئيس الجديد فاحنا فى انقسام رهيب هيؤدى فى الاخر ان البلد دى تنهار و نقعد نعيط جنبها و نرضى بأى رئيس ييجى المهم حد ييجى يمسك البلد بدال من الخراب اللى هنبقى فيه التفاوض ممكن يبقى عالحكومة مثلا وبعدين يبقى تفاوض منطقى بعنى انا هدّيك حاجة و انت فى المقابل هتتنازلى عن شوية حاجات و الكلام اخذ و عطى مش انا عايز اخد كل حاجة و الطرف التانى يحط جزمة فى بقه و يسكت و الكلام دة للى عايز يحل و حقيقة اخرى لا يمكن انكارها ان اللى مزوّد الحشد فى مظاهرات اليومين دول هما الفلول و دى حاجة انا متأكدة منها 100% لان الشباب الثورى عمره ما كان وزنه كدة فى الشارع مش هنضجك على بعض و الا مكانش دة بقى حالنا و انا اعرف ناس شخصيا كانت بتقوم بينى و بينهم حروب ايام الثورة انى اقنعهم ان الثورة حاجة كويسة و هما ابدا مبارك دة حبيبنا و دلوقتى خلاص بقوا ثوريين و بينزلوا مظاهرات و انا اللى بقيت فلول و الناس اللى كانت بتحب المجلس العسكرى و شايفين انهم القيادات المقدسة و يقولك دى مظاهرات اطهر وانقى من مظاهرات 25 يناير بس اى حد هيقول كدة انا اسفة انت شخص مريض مفيش مظاهرات هتكون اطهر من 25 يناير 2011 اللى راح ضحاياها الشباب اللى بحد عايز البلد دى تكون احسن الشباب اللى عنده حلم و كان نفسه يعلى بالبلد دى و زيهم شهداء القصر العينى و محمد محمود اطهر من كدة مظاهرات مش هتلاقى و بصراحة الناس اللى بتكلم عنهم دول كانوا طول عمرهم ضدى ايام الثورة و ايام العسكر فلما فجأة يبقوا فى صفى و عايزين يسقطوا الاخوان يبقى من حقى احس ان فى حاجة غلط واراجع نفسى و اشوف الناس دى ايه اللى غيرها كدة؟ اكيد انا فيا حاجة غلط و دة اللى بيأكد لى انى صح و انى مش بأيد الاخوان ولا بأيد المطالب باسقاط مرسى و الضرب الرهيب فى الاخوان فى محاولة لافقادهم بعض من ارضيتهم بس معلومة الضرب فيهم فى وسائل الاعلام دة ربما يكسبهم التعاطف .. و متخليش كرهك للاخوان يعميك!
Balad El3agayeb 